蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月12日

【wONdEr|皮具醫生】 曾卡冚卡撐起舖頭 卓峰:一個手袋用100年都無問題

21,599
建立時間 (HKT): 0712 16:00

想必每個人都有一件深愛的東西,明明已破爛不堪,但又不捨得丟棄。維修皮具三十多年的鄭卓峰(Harry),被傳媒稱為「醫生」,因他能將破爛及殘舊的皮具起死回生,不論是手袋翻新、染色或修補鞋子都難不倒他。維修皮具對他而言別具意義,「如果你將一件客人覺得無用或舊咗嘅嘢,整到好靚,人哋可以保存到嗰個情意結。」其皮具護理專門店除以「卓峰」為名外,更用自己樣子作生招牌,他坦言:「做我哋手作呢行係無人想出名,我想出名,我想令多啲人知道,皮具其實係可以維修。」

由學徒變老闆
1982年Harry中五畢業,看到補鞋學徒的招聘廣告,心想一生人總需有一技旁身,就毅然應徵做學徒。當時的補鞋匠除了紮根在街邊或橋底外,還有些在商場或地鐵站設店,Harry所應徵的補鞋店就在商場內,他指環境舒適,亦有冷氣。「嗰時做學徒幫人整完啲嘢,爛嘅整翻好,個人係好開心。」其剛做學徒時,每月人工一千元,跟師傅學三個月後便要考試,完成考試後就有佣金,即每月人工大約有三千元,三千元在當時來說已算不俗。

過了六年學徒生涯,在偶然的機會下,Harry踏上當老闆之路。「當時老闆想將七間舖變做加盟店,你邊一個伙記喺邊間舖頭,如果你要做就要比三個月按金及一個月上期,咁呢間舖就俾咗你先。」當時Harry在中環環球大廈的分店做了一、兩年,他聽畢老闆這一番話,便爽快作了決定。他指當時加盟店每月的租金和特許經營費,分別是五萬多元和兩萬元,即使加盟店生意好,但單是特許經營費,一年就要付二十四萬,壓力不輕,故把心一橫在1991年自立門戶「卓峰」,在皇后大道中開店。

一街之隔生意落千丈
Harry認為做加盟店兩年多的日子儲下不少熟客,但他估計錯誤,舊客戶只認招牌不認人,故「卓峰」與環球大廈的加盟店雖只有一街之距,但生意額卻是「一個天一個地」。「當時我哋地鋪五萬七千幾租,我記得第一日生意係一百蚊,第一個月嘅生意額係九千幾蚊,即係話我一個月蝕咗幾多呢?」Harry才發現原來經營自己的品牌是如此困難,亦不明白為何舊老闆的店舖這麼多年生意依然很好,日日有客人排隊。

後來Harry明白到這一行需要慢慢累積客人,「因為我哋係手作仔,客人幫襯咗你之後,唔會咁多人會再幫襯第二次,而係佢做完覺得你做得好先再介紹俾人,係要時間。」足足守了兩年時間的他成功累積不少客人。回想當時困境,他以非常慘形容,「一個月蝕四萬幾,連伙記人工一個月就要蝕六、七萬元,同時又要供樓、供車,向家人借錢又試過,用信用卡卡冚卡又試過。」雖然生意每月都有好轉,但Harry仍用了十年時間才還清卡數。

生意好轉全靠唔揀嘢做
一同起行的人有很多,但一直走下去的人卻很少。Harry指跟他同時做加盟店的師兄弟,有幾個開店半年沒生意就結業。Harry認為「死因」大多是「揀嘢做」,「佢哋只會接容易維修嘅單,難啲已經唔接,容易維修嘅其實周圍都做到。」

開初「卓峰」除了維修皮具外,還有配匙服務,又售賣不同的五金用品,連夾萬都有售賣。Harry後來認為店舖好像雜貨店一般,做的東西不夠專注,就決定取消配匙服務和售賣五金,專注於皮具維修。「嚟到我哋舖頭係知道我哋唔會揀嘢做,平嘅嘢我哋又做,貴嘅我哋又做,有啲舖頭指明係做貴嘢,我哋就唔係,乜嘢都做,總之我話價錢你認為合理你就做。」Harry開始維修手袋亦源於他「唔揀嘢做」,有次客人問他手袋拉鏈壞了,有沒有辦法維修,他便嘗試維修,然後一個傳一個,使不少人將手袋交到他手上。當時中環有超過九成的名店也邀請他合作,縱使現時合作減少,但店內職員仍會私下推介「卓峰」給客人,叫他們前來維修手袋。

與皮為友 從不言退
及後,「卓峰」生意穩定,即使經過金融風暴、沙士等,依然無損生意,「股票升跌其實對我哋係無影響,因為你升,人哋要買手袋、買新鞋,因為新鞋、新手袋,客人都會比我哋整,當經濟唔好,啲人唔買新手袋,會將舊嘅手袋翻新。」Harry更在2010年在深圳開分店,現時深圳設有兩間分店,而原在皇后大道中的地鋪就在2016年搬遷到附近一幢大廈,他在海港城的新分店亦將於今年八月開張。他對維修皮具的前景充滿信心:「潮流二十年轉一次,佢點變我哋就點變。」但當客人要求跟原裝一模一樣的成品時,他則感到無能為力,「我只可話佢知,我可以做類似嘅,但做唔到一樣。」這大概就是皮具獨一無二之處。

三十多年過去,Harry笑說依然喜歡嗅皮的味道,欣賞皮的質感;仍舊享受以自己手工把客人的東西及心意延續下去,故到現時仍沒萌起退下來的念頭,「我仲好努力工作,無諗過退休,直至呢刻我仍覺得係開始。」

採訪:吳梓婷
拍攝:廖健昌

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載