› 選擇地區
三藩市
紐約
洛杉磯
其他美國地區
香港 台灣 北美
 
2019年06月20日

【引渡惡法●獨家】梁凌杰父母首開腔 斥政府不仁不義 惟盼莫再生悲劇

建立時間 (HKT): 0620 21:38

【新增動新聞】
金鐘太古廣場外,連日鋪出一條白色鮮花路,悼念6月15日在廣場高處展示「反送中」標語、其後墮樓逝世的「杰仔」梁凌杰。事發至今已六天,杰仔父母首度開腔受訪。

訪問中,梁爸爸悲從中來,認為「香港病咗」,直指香港人是被不仁不義的政府逼得非常無奈,才會示威宣洩憤怒,「一個人冇可能無啦啦走上去,為咗一樣嘢咁憤怒,咁無奈坐喺度」。最終,兒子意外離世,梁爸爸慨嘆:「係七百萬人嘅悲哀,亦都係下一代嘅悲哀。」不過,杰仔父母均異口同聲,寄語即將再發動示威的年輕人保持冷靜,避免有暴力事件發生,造成損傷,甚至再次上演任何悲劇,「如果有咩事,我哋成家人都好內疚」。

「我個仔唔係一個犯罪嘅人」

「六月十六號個父親節係一個好日子,但係六月十五號嗰一晚,我收到我個仔嘅消息,我真係好心痛。」梁爸爸哭着說。他緩緩地道,杰仔平時少談政治,熱心做公益義工,從不斤斤計較利益,「我個仔唔係一個犯罪嘅人、一個好頑皮、好犯惡嘅人,係一個好純良、香港嘅小市民」。

杰仔是眾多反對修訂《逃犯條例》的香港人之一。梁爸爸認為,只因香港病了,才會促使大量市民抗議,「其實好多人都唔係正式、真正驚佢送返大陸受審,只係一個憤怒,對香港社會一個咆哮,對呢個不仁不義嘅政府嘅一種宣示」。

「咁多日以來,我都唔覺得我個仔係離開咗我哋」

面對親兒離世,梁爸爸謂:「任何一個父母……」未說完,已泣不成聲。身旁的梁媽媽接著說:「都唔會平復到心情,平復到都係呃你哋。個個都十月懷胎,個仔咁突然間離開我哋,點會唔傷心?」她坦言,這幾天仍為兒子準備早餐,仍會為兒子留飯餸,「我哋當佢仲喺身邊,咁多日以來,我都唔覺得我個仔係離開咗我哋」。

梁爸爸繼續說,政府為富人度身訂做《逃犯條例》,對其他香港人卻毫無保障。另一方面,政府無知地追求財富,令年輕人為有錢人服務、做樓奴,低下階層和普通百姓對政策無權過問。

「點解出嚟做呢啲咁辛苦咁熱嘅遊行呢?全因為你個政府」

梁爸爸問:「二百萬人遊行,相信好多人都有回鄉證,任何時間返大陸,旅遊、遊玩都可以。但點解出嚟做呢啲咁辛苦咁熱嘅遊行呢?全因為你個政府,係包庇富人,只有幫助富人,冇真正幫助年輕人,佢嘅去路、出路、任何嘅支援。」

梁爸爸又指,杰仔的遺物中有一封控訴書,對社會表達憤怒、對不仁不義的政權發出控訴,內容與當日展示的橫額如出一轍,要求撤回「送中」、林鄭下台、釋放學生傷者,並重申示威並非暴動。不過,他對政府接納訴求一事不存希望,「政府只有擔心啲有錢人,唔會擔心我哋」,坦言只能無奈忍受。

「唔需要太傷心,唔好太激動;如果有咩事,我哋成家人都好內疚」

梁媽媽感謝社會各界人士悼念愛兒。她說,不知道兒子為何成為大家口中的「烈士」,坦言「我唔需要」,但明白兒子是為了社會不公不義之事而勇於發聲,全家均以他為榮。

梁媽媽希望年輕人上街抗爭時,千萬不可以做出任何傷害自己身體的事情。她亦感謝市民哀悼兒子,但希望「佢哋(年輕人)都唔需要太傷心,唔好太激動;如果有咩事,我哋成家人都好內疚」。梁媽媽語重心長地:「我想啲後生仔、年輕人,唔好再步我個仔嘅後塵。」

「唔係政府逼到香港人咁無奈,係冇人可以做出咁嘅嘢」

訪問臨近尾聲,心情略為平復的梁爸爸說,每一個善良的香港人和年輕人,都不想香港「變衰」,包括兒子在內、每一個走上街頭市民,都是為了表達對政權的不滿。他說,兒子不會無故走到那個平台靜坐,是出於憤怒、亦是出於無奈,「我諗全世界嘅人,唔係政府逼到香港人咁無奈,係冇人可以做出咁嘅嘢。」

記者 勞東來 楊思雅

-----------------------------
你撐蘋果 我捐$1
支援反送中抗爭者

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載