› 選擇地區
三藩市
紐約
洛杉磯
其他美國地區
香港 台灣 北美
 
2019年06月11日

【引渡惡法●三罷】 AbouThai周三休業:履行社會公義 太平飯店加入罷市

AbouThai行政總裁林先生說,作為商人罷市,就是表達對社會不公義的做法。陳善南攝(蘋果日報)
最後更新: 0611 19:23 / 建立時間 (HKT): 0611 15:22

【新增多間小店老闆訪問】

相關新聞:【6.12罷工罷市】林日曦宣佈公司停運一天 「喱騷」CEO杜汶澤:絕不秋後算賬

港府堅持明日(12日)如期交立法會二讀《逃犯條例》修訂草案,觸發市民發起當日罷市、罷課及罷工,截至周二中午已有過千間中小企及網店響應,其中阿布泰國生活百貨(下稱AbouThai)亦加入,早於周一中午已在Facebook宣佈13間分店明日休業一天,獲過萬網民讚好。創辦人接受訪問時坦言,作為商人必然有所掙扎,但衡量過利害,堅決還是要「企喺香港人嗰邊」。

AbouThai行政總裁林先生年僅30歲,他說一直很關心香港發展,認為香港作為國際金融中心,司法獨立是重要基石,《逃犯條例》修訂不單影響未來香港經貿發展,亦打擊香港言論自由,103萬人遊行顯示港人對香港仍心存希望,惟特首林鄭月娥的回應證明政府不再重視人數,作為商人,林說要與港人共度時艱,「社會上每個人角色崗位都唔同,作為商人罷市就係表達對社會不公義嘅做法,履行社會公義係我哋嘅責任。」

相關新聞:【6.12罷工罷市】譚小環小食店宣佈當日拉閘「同大家一齊尋回香港味」

林指出,13間門市分店休業一日,營業額損失可觀,過程中亦需與商場協調,惟他認為一切商業利益犧牲都比不上香港未來重要:「我哋(店舖)嘅損失只不過係數字,但香港人嚟緊損失嘅並唔係數字,而係自由同埋公義。作為香港人、一間香港公司,要為香港負番責任,所以今次都選擇發聲。」

林又坦言,明白其他連鎖店或涉及較多決策階層,時間倉促下或難以像AbouThai全線休業,他希望有能力做到的公司可盡量響應,「正正因為我哋係連鎖店更加需要發聲,好希望我哋唔係唯一一間,理念同埋希望係需要大家共同營造,去爭取番香港人嘅核心價值。」

食肆老闆:為香港未來要企出嚟

32歲太平飯店老闆Gary說,看到特首林鄭月娥在103萬港人遊行後仍「打官腔」回應,「扮到冇事發生咁」,頓時心生怒火,決定不惜犧牲每日2、3萬元營業額也要加入罷市,「香港人平時各自各忙碌,但今次可能已經係最後一次,為咗香港未來要企出嚟。」

Gary曾從事保險業,坦言曾經不問世事,只求賺錢簽保單,但自從2014年雨傘運動後,不時留意大陸新聞,認為內地司法制度絕不可靠,不想快將出生的女兒生活在隨時「被消失」的恐懼中,「毒奶粉事件想追究,喺大陸會被告尋釁滋事等罪,會唔會我個女有一日喺大陸講錯嘢,返到香港又會被『送中』?」

他又指對香港回歸中國後,言論自由空間不斷倒退感心灰意冷,官員犯錯不再需要面對懲罰、「阿爺」似乎已可任意妄為,一旦條例通過,會加快他本來已想舉家移民的意欲。對於「包圍立法會」等抗爭,Gary說由於太太懷孕恥骨韌帶撕裂,2人難以出席,但希望港人即使灰心也不要放棄,「老土啲講發揮獅子山精神,一定會有希望」。

電話維修小店:103萬人遊行都無動於衷 可以點?

32歲的Anlou曾從事傳媒行業5年,2年前與朋友開設電話維修小店,他形容今次政府顯然是以台灣殺人案作包裝,強推《逃犯條例》修訂,「明明有其他方法例如一次性咁移交,佢偏偏要修例,令香港冇咗司法獨立呢道防火牆。」

Anlou表示內地司法制度不公,由被拘捕到開審過程漫長,修例後港人人人自危,故希望略盡綿力響應罷市,令更多商戶有勇氣參與,「如果每個人都行出嚟罷工罷市,影響係可以好大,可惜香港人好多手停口停,要養家供樓,我哋小商戶係nothing to lose,最多唔食飯都頂到一頭半個月。」

他又形容當晚警察與示威者甚至記者發生激烈衝突,認為都是政府放任所致,明晚若有包圍立法會行動,他也會參加,又指雖然不會參與衝擊行為,但也能理解希望升級的心情,「103萬人遊行林鄭都無動於衷,可以點呢?」

相機店老闆撐罷市:我哋都係香港人

Hk Camera的店主蔡先生指,店鋪在6.9大遊行時已罷市一天,被問到如今在12日再次參與罷市,會否擔心生意?蔡先生表示不擔心,「我哋係為咗香港(罷市),如果將來香港變到中國大陸其中一個城市咁,我覺得我哋店都無辦法繼續營運落去,如果政府繼續唔理民意,我哋會繼續罷市落去,因為我哋都係香港人。」他斥責政府今次修例不合理,「呢條條例非常唔合理,你唔能夠因爲一件個別事件而影響成個司法制度,如果次次都隨便因爲一件事去改法例,仲有無需要一國兩制呢?」他指香港與大陸的分別就是在於香港擁有言論自由,認為小店罷市行動正正代表了香港人有表達反對聲音的自由。

至今香港已有逾百間小店表明6月12日罷市反對惡法,蔡先生直言小店力量微薄,「小店的力量其實十分渺小,如果有其他大企業參與罷市行動,影響定必更大,我深信全香港人都很希望大企業參與罷市,但奈何企業需考慮的因素更多。」他表示即使小店罷市影響或許有限,但「我哋小店做到嘅嘢就會盡量去做」,同時希望有更多人知道香港有許多小店為了捍衛香港的自由而放下生意,罷市一天。

婚戒店店主夫婦:要盡義務去表達反對

婚戒店 Dignity.d 開業兩年,亦是本次參與6月12日罷市的小店之一,總監Ashburn指政府在百萬人遊行後態度照舊令他決定加入罷市反惡法,「成百萬人遊行後,政府都可以漠視民意,繼續修訂呢條損害港人自由同破壞香港法治嘅條例,我哋作為香港市民,而我哋公司亦係一間香港公司,要盡番義務去表達一種反對聲音。」Ashburn指公司同事亦非常支持罷市的決定,公司雖然放假,但全體同事也會在12日當天響應民陣號召,在政府總部集會反對惡法通過,「影響生意唔多唔少都有啲,但影響再大都唔夠呢條條例嘅影響咁大。」Ashburn的太太Elkie同是 Dignity.d 的員工之一,她堅定地表示現時是香港的關鍵時刻,「如果我哋依家唔做啲嘢,以後可能就冇機會做,香港係呢個位失守嘅話,香港嘅經濟、政治同學術等都會跟住倒退。」

Dignity.d 在Facebook 專頁張貼6月12日罷市反惡法的消息,被問到對生意的影響,Ashburn明白可能有客人抱相反立場,「呢個係我哋嘅立場,我唔會話太在意有幾多人unfollow我哋個Facebook page,或者唔鍾意我哋公司,正正因為香港嘅法治同自由,造就到我哋公司可以營運落去,如果香港冇咗呢啲嘢,可能我哋公司都冇辦法繼續營運落去。」Ashburn又說即使有人因為本次罷市而討厭 Dignity.d ,他也不會改變立場,因為罷市是公司全部同事對於惡法的表態。

昔日新聞:
電視辯論互叫熄咪 曾:你係撕裂2.0 林鄭:會順應民意辭職

相關新聞:【引渡惡法●三罷】6.12罷市!數百商戶參與(名單不斷更新)

【引渡惡法●懶人包】大律師公會逐點K.O.政府修例理由
【引渡惡法●懶人包】一文睇晒立會法律顧問7點質疑修例

-----------------------------
【新聞有價】6月17日起 繼續撐蘋果
http://bit.ly/2IJ24ZR

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載