› 選擇地區
三藩市
紐約
洛杉磯
其他美國地區
香港 台灣 北美
 
2019年04月12日

【搵笨減肥之二】唔做運動都一個月輕5磅?KOL亂噏戒「敏感食物」可減肥

建立時間 (HKT): 0412 06:03

有健身中心與網絡紅人(KOL)合作推出減肥挑戰短片,在片中提及「慢性食物敏感快速測試」,聲稱抽血後30分鐘可檢出身體對何種食物「過敏」,引導消費者做有關測試後,戒食「敏感」食物促進減肥。專家批評測試無科學理據,寄語消費者「慳番啲錢啦,唔好做呢啲嘢」。

相關新聞:【搵笨減肥之一】食壽司都減到肥?輔洋車前子殼增飽肚感更見效

記者 袁楚雙

KOL「屎萊姆」3月初張貼一條短片,內容是他去健身中心Goji Studios與其他KOL一同接受減肥挑戰。其中屎萊姆獲Goji旗下的營養及治療師團隊YouniBody作抽血測試對甚麼食物「敏感」。片中營養師Hayley稱食物提供營養維持身體運作,但指有些食物「食完會提供能量畀你嘅脂肪」,屎萊姆即回應稱:「即係我測到邊種嘢食特別令我肥,我就避開食?」Hayley指「係啦」。

相關新聞:【搵笨減肥之二】「10樣嘢有7樣唔食得」 營養師:長期可致貧血

Hayley又指,快速測試是「最新嘅技術」,準繩度有九成,「我個客冇做任何運動,只係戒晒慢性敏感嘅嘢,佢一個月輕咗5磅」,屎萊姆說「一定測到我最鍾意食嗰啲嘢全部都敏感」,她答到「其實正常,因為你敏感你唔知,你係咁食,咪儲到個敏感源好高」。屎萊姆最後測試結果顯示對多種食物「敏感」,包括蛋白、蛋黃、牛奶、羊奶、鱈魚、大豆等,被建議在一個月的減肥期間戒掉「敏感」食物。

短片發佈後於YouTube與facebook專頁觀看次數逾10萬,兩個平台都有不少人留言查詢驗血測試詳情。記者以顧客身份查詢,測試全名為「慢性食物敏感快速測試」,價值1,250元。職員指會抽血化驗IgG抗體(食物特異性免疫球蛋白G),30分鐘有結果,又指人體內有炎症會積聚毒素,毒素使人難以減肥,如果戒走致敏食物,即使不刻意減肥,也可以「減到幾磅」,及改善其他「敏感」症狀例如易倦、失眠、皮膚敏感等。當問及減肥效果時,職員才指不會直接有助減肥,該測試是驗食物不耐症,建議想減肥可加購排毒療程。

免疫及過敏病科專科醫生鄔揚源認為,該測試沒有科學根據,他指IgG是免疫系統對食物的正常反應,只要30分鐘測出IgG,早於80年代已出現,但與食物敏感和不耐無關。他引述醫學文獻指出IgG測試食物過敏是一個「全球性的騙局」。

香港過敏醫學會主席何學工質疑測試純屬噱頭,「正統過敏科冇人做緊咁嘅測試,依家係有快速測試,但同減肥冇乜關係。」他指醫學鑑定病人的致敏源,需要看症狀及過敏史,假如病人有肥胖問題或要加驗血脂,但過敏一般難單靠驗血找到致敏源,或需要通過病人戒口和反復測試才有結論。關於過敏與減肥的領域,他表示目前正統醫學「冇乜講法,所以你鍾意講咩,總有啲人可以搵到食。我就勸消費者,慳番啲錢啦,唔好做呢啲嘢。」他認為將休息不足的症狀混為一談,是偽科學表現,「其實你可以將所有嘢同食物拉上關係。」

香港營養師學會資深營養師潘慧德表示,如果對食物過敏出現哮喘、痛症等,肥胖人士的炎症可能比瘦削人士嚴重;然而進食過敏食物太多,卻不見得會引致肥胖,醫學上暫無廣泛共識支持這項說法。

屎萊姆經理人回覆稱,Goji一直是屎萊姆的健身贊助商,減肥比賽是雙方構思,內容為屎萊姆創作,完全沒有對白及劇本,至於有關測試是聽取Goji的教練及營養師指示,稱相信對方意見,他們現正向Goji了解詳情,如證實測試無效將出聲明回應。YouniBody至截稿前沒有回應。資料顯示,Goji Studios 2017年在本港冒起,多家分店為前健身中心California Fitness舊址,主力賣健身服務;Goji關聯公司YouniBody則售賣皮膚健康、營養基因等不同測試、諮詢及營養產品。

-----------------------------
動腦Q金像獎周
4月8日-12日 10:30PM
Let's Q the money!Action!
https://hk.adai.ly/zpCd06PPwV

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載