蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年03月30日
馬上成為壹會員

【法政巴絲】修例送「中」 夾你返大陸呀嗱!

內地官方公佈銅鑼灣書店股東桂民海嘅罪名係「交通肇事罪」。《逃犯條例》修訂通過後,只要涉嫌干犯修訂所包括嘅罪,就有機會被引渡到內地受審。
建立時間 (HKT): 0330 07:00

3月將完4月將至,又到咗約friends去旅行嘅季節,筆者本來都約咗幾個朋友去泰國旅行,check晒機票酒店諗住畀錢啦,點知有日返返吓工就見到個WhatsApp group係咁有notifications,原來係我兩個朋友喺WhatsApp度無端端隔空為咗國民身份認同對罵,鬧到旅行都去唔成。

相關新聞:【移交逃犯●拆局】港媒自我審查機會增 前記者:駐京真係腳都軟埋

A:你咁唔like祖國,有冇諗過離開去異地啫?
B:祖國?我祖國係香港。
A:香港?香港唔係一個國家嚟㗎喎!祖國係中國先真,大家都係中國人!
B:你唔好拉埋我落水呀,我填任何文件我國籍都係填香港,nationality:Hong Kong!
A:你呀,支持港獨,因住我哋去泰國嗰時好似桂民海咁比人夾返大陸呀!
B:係呀係呀,你同我同行小心啲呀,一陣你比你嘅祖國誤會,夾埋你上去就唔好啦!
A:為免浪費大家美好嘅假期,我都係唔同你哋去旅行住啦。
B:係㗎,同埋都係為咗你嘅人身安全着想啦!

呢啲時候我就當然係唔出聲,靜靜地食花生啦。旅行去唔成事小,燒埋我事大嘛,但講開又講,過咗《逃犯條例》嘅建議修訂的話就唔到我哋食花生喇。我呢兩個朋友而家就笑話去泰國會好似銅鑼灣書店股東桂民海咁被帶走,但到過咗修訂,喺香港睇緊TBB嘅朋友A、訪港嘅遊客C、甚至只係路過香港轉機嘅路人D,只要涉嫌干犯《逃犯條例》修訂所包括嘅罪,就有機會被引渡到內地受審。

相關新聞:【移交逃犯】屢借不同罪名打壓記者 洩露國家機密乃常用撒手鐧

商界提議剔除商業罪行,政府又話政治罪行唔會被引渡,但如果大家仲記得,桂民海俾人捉走之後,中國官方公佈嘅罪名係「交通肇事罪」。就算而家政治和宗教罪行不被納入適用於移交的罪行範圍,內地當局依然可以用其他如欺詐、賄賂及走私等罪名提出移交要求。當然,可能你會好似廠商會會長吳宏斌咁諗:「你估特區政府真係好得閒?唔嚴重嘅案件都攞去畀特首批?根本唔需要擔心。」而家政府都話如果要移交,會由特首啟動程序、法庭審批,已有足夠把關作用,好似台灣嗰單謀殺案咁,咪就係因為而家有漏洞,移交唔到佢去台灣,令到公義未能得到伸張。但要堵塞漏洞,好似大律師公會以及法政匯思建議,將修改後的法例訂明為只適用於台灣,剔除中國內地及澳門,就已經可以。點解要大費周章,正如民進黨籍的陸委會副主委、發言人邱垂正話齋:「只是要吃牛奶,為何要養頭牛?」

作為一個奉公守法嘅良好市民,你可能一世都未踏足過法庭,但你試幻想一下,香港法庭睇完大陸當局提供嘅表面證供,就要將你移交去大陸受審,你可唔可以接受?有日洗頭艇都唔使,你就睇到新聞話又有港人被引渡到大陸受審,你又可唔可以接受?

如果唔得嘅,我喺呢度呼籲你同我哋法政匯思嘅成員一齊參與民間人權陣線聯同民主派立法會議員喺2019年3月31日下晝3點舉行「反對修訂引渡條例」遊行,集合時間係下晝2點半,地點係灣仔盧押道修頓球場(側),到時見!

何天晴 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

-----------------------------
免費訂閱《蘋果動新聞》, 無懼霸權橫行!立即登記!
https://hk.adai.ly/bXz2v29BrV
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/veCxssynnV

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載