蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年02月02日
馬上成為壹會員

【法政巴絲】律師也唱歌

《蘋果》製圖
建立時間 (HKT): 0202 07:00

近年筆者聽到有幾個年青人都係法律系畢業之後決定投身歌唱事業,因為佢哋嘅年紀都同自己差唔多(最近仲有個係細過自己),所以都幾鍾意唱歌嘅筆者有時都會幻想吓自己企喺台上面唱歌,開心下都好嘛!

講開又講,其實筆者都見識過唔少同行唱歌係真係好好聽,直頭係專業級數咁樣。仲記得Year 1嗰陣去做internship,嗰陣team leader就帶晒成班人去唱K,嘩!一開口真係唱到成個李克勤咁,幾鬼犀利。幾年之後我去啲同行搞嘅唱K聚會,又聽到有個大自己幾年嘅師兄有嗰種圓渾低沉嘅聲線,當刻真係想即刻介紹兩位先生認識認識!另外據筆者所知,有個年輕大狀喺中學時代已經參加過唔少大型歌唱比賽,拎過獎仲上埋電視添,後來佢參加跨行業嘅歌唱比賽時都有拎到獎,真係好叻女。

獨唱有獨唱嘅開心,合唱或者夾band又別有一番風味。筆者都知有港大舊生經常會返去佢哋嘅Law Alumni Choir度唱歌,而佢哋又真係年年都會搞個有特定主題嘅表演,筆者都曾經去捧過場,覺得真係幾高質!另外大律師公會都有個Band Society,雖然筆者就未有機會聽過佢哋嘅show,但係就有機會聽過其中一個女大狀唱K,把聲真係好正(一秒變粉絲);筆者仲喺網上見過Law Society派出佢哋嘅成員喺Law Week嗰陣大展歌喉,夾live band嘅片真係好熱血呀。

講個秘密畀大家知,其實筆者細個就係嗰啲鍾意喺校巴上面同某幾個同學係咁唱歌嘅小朋友喇(當年被迫聽晒成程嘅人請你哋原諒我!)亦因為咁,細細個都有幻想過將來做歌手,不過幻想歸幻想,無能力實踐到。筆者讀大學嗰幾年有時都會擔心將來入咗行,話自己鍾意業餘唱吓歌,會唔會好奇怪?不過見住咁多同行都不吝於分享自己美妙嘅歌聲,閒時又有各種各樣嘅表演機會,相信筆者當年都係過慮喇。

雖然演藝嘅大台輪唔到自己,但係筆者都係會繼續開心享受唱歌,做個鍾意唱歌嘅大律師,哈哈!

藍天柳 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。


10萬蚊30人分!《動腦Q》新春Q多寶
年三十至初三 3:15pm、10:30pm
豬年動腦,Q多啲money!
http://bit.ly/2QW8LcI

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載