蘋果日報 | APPLE DAILY
› 選擇地區
三藩市
紐約
洛杉磯
其他美國地區
2019年01月13日
馬上成為壹會員

【MeToo無辜男】召集被屈同路人伸冤 前大專講師:唔敢再望女人

建立時間 (HKT): 0113 00:01

去年全球掀起「#MeToo」風潮,不少女士鼓起勇氣說出被性騷擾真相,但受害豈止女性。過去在本港多間大專院校任教的男講師Ben,之前無故被指性騷擾女同事,流言持續一年,最終被迫黯然離職。阿Ben慨嘆,「唔知我個樣生得衰定點,可能好似我咁講,青靚白淨啲嗰啲咪冇事囉……」可能有人認為,男性被指性騷擾他人是有跡可尋,但Ben就坦言,「真係無啦啦話你,你都解釋唔到㗎……」事過境遷,Ben最希望可以成立一個群組,召集一眾被屈同路人,與無辜男一同伸冤。

相關新聞:【Metoo無辜男】逼港鐵三招自保 律師拆解性騷擾有冇得誣告

記者 周詠雯

「一定有啲男士俾人妄告呀誣告嘅,只不過MeToo聲大呢,你唔敢講呢啲。」阿Ben是少數有勇氣在鏡頭前現身的男士,一個流言,困擾逾年。回想事件,阿Ben亦感不名所以:一名從無溝通的女同事,突然在座位旁貼出反性騷擾單張,其他同事一問,女同事直指阿Ben「望心口」,謠言就由此起。

那時候,阿Ben的男同事曾叫他無視流言,但阿Ben曾見過數名同事圍在一起耳語、指指點點,當阿Ben步近,就有人說「啊都係唔好講喇!」阿Ben心知自己被談論,心裏不好受;任職教育界,被指性騷擾亦影響其專業,故決定主動報告上司及人事部。女同事亦向其上司承認有說過「望心口論」,可惜人事部草草處理,「同我講叫我唔好行過去,又同佢(女同事)講叫咗阿Ben唔好行過嚟」,就當了事。阿Ben意興闌珊,事發一年後決定離職。

其間阿Ben曾發信指女同事誹謗,女同事否認。糾纏多時,阿Ben現時最大願望已不是要對方道歉,而是希望此等誤會不再發生在其他男性身上。阿Ben坦言,在性騷擾糾紛中,男性往往較為蝕底。「(有人)好輕微暗示你係衣冠禽獸,嘩咁你一定係喇,唔係無啦啦點會講你吖!」此等觀念有待改變,「佢望我,就一定係想咸濕我?即係人哋make eye contact呢,係有好多原因」。

香港男士協會之前接收了過百宗「無辜男」個案,主席梁志強指,協會最初只是「聽佢哋打嚟呻」,後期如遇男士有心靈或法律問題,就會協助轉介至不同機構。有個案懷疑因同事之間「爭上位」,女職員就聲稱被男職員非禮,最後人事部以多付三個月薪金要求男職員離職;亦有男子在港鐵自拍被誤認為偷拍女乘客,即使男子公開「出櫃」指自己是同性戀,但仍不被相信,女乘客最終拋下一句「你係男人我梗係要懷疑你㗎啦!」然後離開。

男性被懷疑是否必然?梁志強指,不少人先入為主認為男士等同色狼,亦認為男士就是強權、剝削他人,所以男士往往在這些無辜男的案例中,屬蝕底一方。

不過,關注婦女性暴力協會主席王秀容就指,女性敢於指控男性性騷擾,其實並非如想像中多。在風雨蘭的求助中,不少求助者擔心舉報公司同事甚至上司會影響工作,故被性騷擾長達一年後才會「出聲」,「所以女性因為呢啲事攞着數而比較少見」。

王補充,如果有受害人指控別人性騷擾,旁人不應質疑受害人感受、或是懷疑受害人是否太敏感。而事實上現時亦有客觀標準,以第三者角度判別有關行為是否屬性騷擾。如有人懷疑自己被性騷擾,可立即表明立場,並記錄有關資料,若有關行為再次出現,便可尋找可信任人士求助。

經歷此事,阿Ben直言現時「望其他女士都有陰影」。阿Ben指分享經歷並非反對女性伸張正義,「冇人會反對你出嚟出聲,要攞返個公道」,但同時亦要關注是否有女性濫用「MeToo」。「呢個男人衰咗,下一個男人繼續衰、再下一個又繼續衰、點解呢?因為大家冇voice out過囉!」阿Ben希望組織同路人一同伸冤,「最大嘅心願係唔好再有咁多呢啲誤會」。

編輯推介:

污染物濃度爆標!超世衞標準逾3倍

警隊175周年辦同樂日 林鄭讚揚警隊工作:是我外訪時的金卡片

【東涌淪陷】傳取消強國客車票限購 金巴否認:繼續維持現行安排

【收緊長者綜援】李慧琼變臉:斷言否決預算案是草率不負責任

【蘋聞追Click】大台劇又亂吹 醫生批《守護神之保險調查》誤導

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載