› 選擇地區
三藩市
紐約
洛杉磯
其他美國地區
香港 台灣 北美
 
2019年01月09日

【李八方online】「關鍵一席」變「關鍵缺席」?楊岳橋為提動議撻Q鞠躬道歉

建立時間 (HKT): 0109 17:53

立法會原定今日辯論公民黨黨魁楊岳橋(AY)提出,有關單程證審批權嘅議案,但最終因為AY不在席提唔到動議,主席梁君彥最終宣佈完會。本土派咁關注嘅議題,AY都可以甩底,「關鍵一席」變「關鍵缺席」,自然又引嚟唔少人抨擊,本來係同本土派聯繫嘅議題,唔知會唔會因此令AY再遭狙擊?點知呢頭完會,果頭AY已經現身,為失場鞠躬道歉。

到底消失的AY,當時去咗邊?佢解釋因為喺辦公室收睇政制及內地事務局局長聶德權講述《國歌法》嘅記者會直播,疏忽之下,冇到會議廳動議自己嘅議案,連番強調今次疏忽、大意嘅責任,完全喺佢一個人身上,要向期望有呢個辯論嘅市民、與及早就準備好就議案發言嘅議員致歉,講完佢就後退一步、鞠躬致歉。

雖然今次甩咗轆,但AY強調唔會停止關注單程證問題,亦會爭取再討論,包括今年內就改革審批單程證制度提出私人草案,今日稍後會將原本今日喺會上嘅發言稿上載至網上。至於今次事件畀佢嘅教訓,佢用六粒字總結:「一心不能二用」!佢重申事件係自己疏忽造成,「今次唔能夠提動議唯一責任係我楊岳橋」,佢冇同民主派討論能否由其他議員代為重提議案,但會先與公民黨黨友商討。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載