蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年12月01日

【法政巴絲】法噏風之金庸篇

7,364
建立時間 (HKT): 1201 07:00

老嘢問Z世代:「你讀過金庸小說未?」

Z世代:「未!淨係睇過劇。」

老嘢繼續噏:「咁你知唔知金庸寫嘅十四部小說嘅書名第一個字,串起嚟成一句詩:『飛雪連天射白鹿,笑書神俠倚碧鴛』?」

年輕人:「唔知喎……但我有讀J. K. Rowling嘅哈利波特系列。佢寫嘅七本小說嘅書名第一個字串起嚟係:『哈哈哈哈哈哈哈』!」

金庸先生雖然已仙遊,但佢寫嘅經典小說人物就每日活在眼前,法律界又點會例外。

呢頭寫緊稿,果頭慘叫又要老嘢執手尾!嗱嗱嗱啲新仔就好似「俏黃蓉」個女「郭芙」咁,行事有啲魯莽、任性,唔識咩叫人情世故,做錯嘢又唔知衰,下下要人傍住護航,斬埋「楊過」隻手,要人補鑊。嗱嗱嗱冇話佢哋心地唔好吓,只係被寵慣咗喳!

諗諗吓有位法官好似「洪七公」咁,喂喂喂唔係話佢似乞兒呀,而係似「洪七公」咁嗜美食,地位德高望重,正直無私、受人敬重。有一次聽審,佢喺庭上使出無數奧妙變化嘅『三十六路打狗棒法』,勁道凌厲令人無法抵擋。有時法官又會化身「金毛獅王謝遜」,『獅子吼』一出,音波嘅威力人人震到心慌慌、口窒窒。

早前環島遊賞花撞到前輩大狀,一頭白髮留咗鬚,面帶七分邪,邪中又帶三分正。聽講佢好少同人打交道,平時亦唔聲唔聲,但上到庭就嚇你一驚,出手狠、不按常理出牌,好有「東邪」Feel!

另一大狀就好似「東方不敗」咁,印象中未輸過官司咁滯,高深莫測,出手快、先發制人,性情好似天氣咁不似預期陰晴不定,跟佢嘅人都騰騰震,冇得腳Un Un。(註:冇自宮)

唔使講律師呢行見過好似「韋小寶」咁嬉皮笑臉,擦法官鞋又有;好似「太極宗師張三豐」咁無招勝有招(冇睇熟Paper就上Court)又有!行內亦暗藏無數「君子劍岳不群」,表面正氣、謙謙有禮,暗地裡陰險奸詐、爭權奪利、虛偽不實。不過,身邊亦有不少俠士「胡斐」,心地善良、行俠仗義,路見不平、拔刀相助。

總之,法律界武林高手雲集,數之不盡。我呢啲老嘢最想做嘅梗係「周伯通」啦,漠視俗人眼光,醉心鑽研法律,可以好似老頑童咁無拘無束任意玩樂人間,自得其樂!

仼何仁 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載