› 選擇地區
三藩市
紐約
洛杉磯
其他美國地區
香港 台灣 北美
 
2018年11月17日

【法政巴絲】Young bar新氣象

大律師公會早前通過了兩項議案,有利於新晉大律師。(資料圖片)
建立時間 (HKT): 1117 07:00

話說就喺兩、三日前(11月14日),大律師公會舉行咗一個特別會員大會,(Extraordinary General Meeting,即EGM),並經過會員投票通過咗幾個議案。

當中有兩個議案對新晉大律師(Young barristers;即執業年資少於7年的大律師,簡稱Young Bar/YB)嚟講特別緊要,點解呢?

第一樣就係「paid pupillage」(意即有償大律師實習)喇。如果大家有留意我喺呢個專欄第一篇文《到底乜嘢係pupil?》(希望有人睇過啦,嗚嗚)嘅話,應該記得我曾經同一眾朋友仔講做實習大律師(pupil)係無錢收呢樣嘢。不過以後諗住入行嘅同學仔留意喇,由2019年9月1日起,每個pupil每個月都會有6,000蚊嘅酬金(honorarium)。

之所以會有呢樣改變呢,就係因為公會嘅執行委員會留意到而家行業生態唔同以前,就算實習半年之後可以有限度執業(limited practice;詳情可以見另一文章《你搞咗limited practice未呀?》),都未必可以接到咩生意,變相12個月實習都係無乜收入咁過。

之前同啲法律系同學仔傾計,經常都會被問:「做大律師係咪好難生存㗎?」──無呃你,幾乎每個都問㗎。而家實習一年裡面每月6,000蚊至少會係你一年工作嘅一啲回報,可以補貼下你嘅生活。

至於有啲人可能擔心因為咁樣而少咗實習嘅機會,就住呢點公會都有作出調查,結果發現唔少而家有收開徒弟嘅大狀都支持呢個計劃嘅。所以各位有志投身呢行嘅同學仔都唔使太擔心!

另一樣平時較少人留意嘅就係「supplementary occupation rule」(意即有關副業的規則)嘅改動喇。簡單嚟講就係大律師如果要投身副業之前,一定要事前獲准先可以(有例外嘅,例如係做立法會議員或者兼職教法律等等)。據聞現行制度下執行委員會每個月都一定會收到申請,但有啲申請幾乎係無咩爭議嘅,例如係想教下琴呀、補下習咁,有啲Young Bar都會想當係兼職咁做嘅。

咁考慮到大律師守則本身已經要求每個成員都唔可以做有損行業聲譽嘅事,執行委員會就建議以後由事前獲准改成事前通知,公會只會喺特殊情況下詢問副業嘅詳情,咁樣就會令各位大狀喺安排各類工作方面有更多彈性喇!

其實兩個議案都算係幾大嘅改變,我都真心欣賞公會有特別考慮到實習同新晉大律師嘅處境,又好快咁推出議案出嚟表決!更高興就係呢兩個議案都獲得通過。雖然paid pupillage已經唔關我事,但話唔定好快我又可以重操故業,去教下小朋友琴了!

藍天柳 @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載