蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年11月10日
馬上成為壹會員

【法政巴絲】觀禮記

最後更新: 1110 09:18 / 建立時間 (HKT): 1110 07:30

「書記,請你推張櫈比犯人欄入面果位抱住BB嘅女士坐。」法官大人說。果位女士唔係犯人,而係我朋友。我地上星期去法庭出席B接受法庭認許作為事務律師 (admission ) 儀式,因為觀禮嘅人多,連平日用作犯人欄嘅地方都逼過週日嘅東涌。

明顯地,犯人欄係冇關愛座嘅。好在法官見到我呢位朋友吃力地抱住BB又冇位坐,叫書記安排,朋友同 BB 先可以休息下。

安頓好後,儀式開始,B嘅律師代表(佢老板)先讚美B一輪(佢真係抵讚㗎!),比法官知道點解呢個人適合成為司法界嘅一員,然後代表B向親友致謝。法官叫B宣誓,要揭盡所能做好律師嘅職責,禮成。

同場仲有幾位準律師:有個律師代表講講下自己激動到喊,原來佢係個準律師嘅爸爸,已經等左呢日好耐;有個準律師已經喺美國、英國、澳洲、新加坡同中國取得執業律師嘅資格,比法官笑佢喺香港 admit 當集郵;又有個律師代表同準律師係認識多年嘅好友,律師代表致詞時猛喺度爆阿準律師以前啲瘀嘢,好笑之餘又充滿男人的浪漫。

跟住法官勉勵幾位新律師,要堅守崗位,時刻不忘自己係司法界嘅一分子......聽到呢度,我好戥B開心之餘,亦為司法界多一位有正義感有愛心有能力嘅成員而慶幸。

散場後,我聽到之前坐喺犯人欄幾個人嘅對話,隱約估到佢地係法律系學生。我見佢地幾個年輕人,四肢健全,健步如飛,果刻我真係火都喺 5cm 嘅深度果度燒起上嚟。我好後悔當時急住走人(加埋淆底)冇走去同佢地講,讓座呢件事,你地當中任何人都做得啦!唔讓座唔係犯法,但我對你地唔讓座好失望!希望你地 admit 成為律師之前可以學會關愛,唔好對有需要嘅人同不公平嘅事視而不見,只係懂得所謂依法辦事,因為咁樣嘅律師,分分鐘會成為某啲人嘅工具。

Cherry Lam @ 法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載