蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月13日

【李八方online】恩恩豬認有喜 明年新年誕豬B

32,764
建立時間 (HKT): 0913 00:02
容海恩接受now新聞訪問,終於承認有咗BB已經4個月。

恩恩豬親證有喜!上月下嫁同黨政策總裁袁彌昌嘅新民黨立法會議員容海恩,接受now新聞訪問嘅時候終於解開腹中係咪多嚿肉之謎,承認有咗BB已經4個月,預產期係明年二月農曆新年,即係會生個豬BB喎。自從傳出婚訊,恩恩豬都冇認過有B,明嘅明嘅,BB好小器㗎嘛,唔過3個月都唔可以公開㗎!

睇返訪問片段,恩恩豬身材仲係好fit,未見肚,相信日後都仲會係一名辣媽。今次奉子成婚,實有人閒言閒語,但恩恩豬喺訪問度話結婚完全係個人選擇,尤其係職業女性,有自主性咁話喎。

八方打電話畀恩恩豬,親自恭喜佢,佢話而家有孕吐情況,一早一晚特別唔舒服,多得屋企人都會多加照顧。到底BB係囝囝定囡囡,恩恩豬話要「保持神秘」,亦都未諗改咩名。唔知係咪潮流興搞baby shower,到時先揭曉呢。咁對BB有乜期望,話晒香港地競爭大,使唔使諗定細路讀乜幼稚園、上咩興趣班啊?本身係大狀嘅佢話,無諗到咁遠,最緊要BB身體健康,仲話已經入咗啲媽媽group,又會密切留意forum最新資訊,「而家仲諗緊買咩BB床咋!」

陀B唔容易㗎,仲要係身兼代議士一職,呢頭正式公布喜訊,恩恩豬就已經約咗立法會秘書處今日傾吓日後安排,佢話唔係要啲硬件嘢,「真係產假嘅安排,同埋投票啊!」驚住生仔嗰陣又要坐月幾個星期返唔到工,「希望投票嗰度行個方便」,仲話放十周產假簡直係奢望,但希望可以用大肚婆身份為一眾女性謀福利咁話,「始終社會傾咁多,去到14個禮拜,無理由立法會無㗎,自打嘴巴㗎嘛!」

恩恩豬有喜係一大喜訊,BB將會係立會第一B,各位議員同事都要幫手爭取啦!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載