蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年08月10日

【李八方online】恩恩豬結婚半島擺4圍 雙喜臨門?容媽咁樣答

437,509
最後更新: 0810 18:32 / 建立時間 (HKT): 0810 12:39

【新增相片】
萬眾期待,41歲嘅新民黨議員容海恩(恩恩豬)今日同政策總裁袁彌昌拉埋天窗喇!兩人喺證婚議式前一同見記者,見恩恩豬疑似粗身大細,都仲著住4吋斗零高踭鞋,仲要落樓梯,八方都替佢捏一把冷汗,好在袁總好快就出手護花,拖住老婆。

恩恩豬一身白紗,笑容滿面咁,八方都真係戥佢開心呀!袁彌昌對於老婆似乎好滿意,舉起手指公話:「right choice ,係最好嘅選擇」而於恩恩豬就希望老公「一路都係咁好」喎!

問到有咩心情,恩恩豬就話原來結婚真係好多嘢搞,坦言「要結婚完來都唔易呀」,有好多嘢要籌備。咁係唔係就快做爸爸呢?袁總就話「有消息會話畀大家知,都有咁嘅希望喎」。

至於姐妹之一嘅工聯會議員麥美娟就透露,今朝都有按傳統玩新郎,遊戲就包括邊做掌上壓邊食生果,同埋互餵環節,仲強調「好衛生架」,但佢就無講開門利是有幾多喇。而袁彌昌個妹袁彌明就同丈夫林雨陽現身,不過就避開無見記者。

恩恩豬同袁彌昌下晝喺半島酒店7樓宴請親朋好友。半島今日就貼出告示講到明「Eunice & Derek Wedding ceremony」今日舉行。據聞儀式下晝1點舉行,1點半係午宴。

早喺中午12點左右,麥美娟就帶埋恩恩豬嘅媽媽現身見記者,容媽媽一身紅旗袍加上一大串珍珠頸鏈,睇落非常雍容華貴,問到佢對於女婿滿唔滿意,容媽媽笑晒咁話「101分呀!好滿意」,佢仲向在場記者派餅卡同利是,好喜氣洋洋。

容媽媽又透露,今早已經喺酒店完成斟茶等儀式。恩恩豬係唔係雙喜臨門呢?Alice就即時擋駕,話「今日只係講結婚」,容媽媽就好識做,淨係話佢唔知咋。

臨近1點,賓客都陸續到場,恩恩豬同袁總嘅「媒人」新民黨主席葉劉淑儀就一襲白裙現身,外套上仲有Lace,衣著上畀足面。葉太話祝佢哋兩個早生貴子,仲話送咗銀行禮卷畀佢哋,等佢哋鍾意買咩就買咩。而新民黨副主席潘國山亦有現身,不過就十問九唔應。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載