蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月02日

【網民hot talk】歧視普通話爆羅生門 甲寅年學生齊撐溫老師

116,808
最後更新: 0502 17:22 / 建立時間 (HKT): 0502 00:03

喺香港地同人溝通,好多時都要用廣東話;根據政府資料,平均每100個人就有89.1人慣用廣東話,只有唔夠2人慣用普通話。近日喺校園入面,就發生離奇「禁講普通話」嘅羅生門事件;有傳上水東華三院甲寅年中學有幾個中一學生,上堂嗰陣用普通話講粗俗語言,畀老師指摘,另一版本就話,學生係喺課外時間講普通話,但畀老師警告「唔該講返廣東話,如果唔係,唔該唔好喺度讀書」。有facebook secret page出po,鬧老師譏諷同針對講普通話嘅學生。不過公審唔一定有道理,唔少校友同網民都力撐老師,話嗰間中學係英中,老師並無歧視同學,只係鼓勵同學多講廣東話,唔好喺中文科口試失手。

相關新聞:用非博士內地學者文章棄港權威 Ben Sir狠批教局壓抑粵語

事緣一個無署名嘅網民,上星期六(28日)喺facebook專頁KYD Secrets出po,點名批評嗰間學校教家政嘅溫老師,同訓導主任王老師,話佢哋挖苦、譏諷同針對喺課堂外講普通話嘅中一學生:「唔該,甲寅年係一間香港學校,喺香港讀書,唔該講返廣東話,如果唔係,唔該唔好喺度讀書。」樓主認為,呢兩位老師擺明係「針對某些言語種(族)群,發表一些歧視言論」,暗示不歡迎講普通話嘅學生。樓主聲言會「連(聯)署」向辦學團體反映,同埋去教育人員專業操守議會、教育局同平機會投訴,又會「連絡」傳媒揭發呢件事,重新「打造」一個公平同自由嘅教學環境咁話。

不過,唔少網民並無盲從公審,仲好撐嗰兩位老師。有網民話,自己一出世就講廣東話,聽到啲「80%普通話溝20%廣東話」嘅新式語言,扮晒係廣東話,就覺得好「un耳」,想普通話同學尊重返廣東話,唔識可以學。亦有自稱代表該校師生嘅網民話,希望啲普通話學生可以退一步,嘗試融入學校。更有網民為老師發聲,話老師冇歧視,「只係鼓勵我哋講多啲廣東話,唔好係口試失手」。

相關新聞:廣東話非母語?大學生斥教局奉承中央:令本土文化消失

呢個投訴po好快就成為網民熱話,短短3日就有超過700人畀嬲嬲,佔回應總數近70%。雖然個po無署名,不過睇返啲行文用字,唔似係本地人寫,例如叫「聯署」做「連署」、「聯絡」變「連絡」、「維護」寫成「打造」,而且仲有唔少白字,例如「學藉」、「什至」等。有知情人士仲留言踢爆,嗰幾個學生因為一直喺度講普通話,仲夾雜粗俗字眼,Miss Wan提醒過佢哋,但冇收斂,先至警告佢哋「唔該講返廣東話,如果唔係,唔該唔好喺度讀書」。

一直關注本港「普教中」問題嘅「港語學」召集人陳樂行就慨嘆,廣東話同普通話喺香港嘅待遇好唔同,佢話試過有抗爭者講咗個廣東話粗口字而廣受批評。佢認為,如果嗰幾個學生因為講普通話粗俗語言,不忿畀老師責罵,就喺網上點名話老師歧視佢哋,咁係惡人先告狀,小事化大去公審老師,有機會令老師教席不保。

網民點睇

Elaine Wan:我係客家人,強烈要求客教中呀!
KL Man:做乜針對老師?中國人識唔識尊師重道呀?
林柏基:文革餘毒,咁細個就識得利用媒體對老師人格謀殺
Kin Jai:要求集體表揚該名有態度嘅老師
梁金金:係香港梗係講廣東話㗎啦!你班支國蟲,若果唔係貪個免費教育,同埋你班仆街可以放學帶水貨走私,仲乜落嚟北區返學呀!死返上支國啦!
Tse Kam Chai:個老師做得好,同學他日去歐美留學記得繼續用普通話,唔好用當地語言呀

(編按:截至報道出街,喺個po都未見到有留言撐學生,啲留言都係一面倒,如果你認為老師歧視佢哋,歡迎到《蘋果》網站留言。)

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載