蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年04月07日
馬上成為壹會員

【批鬥戴耀廷】李柱銘:我哋需要硬頸嘅人

建立時間 (HKT): 0407 21:11

北京、港府及左派連日文革式批鬥港大法律學系副教授戴耀廷,標籤他是港獨分子,再次敲響打壓言論與學術自由、23條重臨的警鐘,民主派今晚7時聯同民陣舉行集會抗議,多位政界元老和立法會議員均到場聲援,並上台發言:

相關新聞:【拆局】憂燒到23條立法 林鄭首開腔降溫

李柱銘

我叫戴做「彬仔」,佢做學生時跟過我。佢好硬頸,我哋需要硬頸嘅人。港獨掉轉講係「獨講」,淨番佢一個講,佢都講;第日坐監,佢都講;人哋預備鎖佢,佢都講區選、立選,有乜法子唔鎖住佢?

吳靄儀

我有兩點要求,唔該唔好講嚟緊會推23條加辣版,因為2003年嗰陣已經夠辣;第二點,言論自由要入罪,只有一個情況,係煽動暴力,大家記住,只要唔係叫人暴力,就無罪。請大家記住,守護香港每一刻,都唔可以鬆懈。

相關新聞:【批鬥戴耀廷】斥戴非單純學者講港獨 葉國謙:會唔會幼稚咗啲?

楊岳橋

港珠澳大橋甩晒轆,林鄭話,唔好因一張相而信;但戴講幾分鐘,由林鄭到港澳中聯辦到左仔,就全部信晒,不過係信佢哋自己嗰套,好似中咗降頭。戴講嘅,是將來的假設,咁都打壓,將來不用有創作、學術討論。現在要清楚講:香港唔係畀佢哋搞文革嘅地方,香港唔係俾佢哋亂嚟嘅地方!佢哋而家越踩越埋,各位要繼續撐住。

黃碧雲

今日撐戴,更重要係企硬;港面對大陸化的危機,好多嘢開始唔講得,言論自由有禁區,學術自由有禁區,講結束一黨專政,似乎都唔得,「真係相信基本法,就要令香港同大陸唔同」。土共、建制派爭先恐後要將香港變大陸,但基本法27條話港人有言論自由,34條話有學術研究嘅自由,所以大家要企硬,若不能守住言論自由,做我哋想做嘅研究,一國兩制就玩完,香港都淪陷。

邵家臻

有人話戴踩到紅線,係咩?我覺得係紅線踩到戴,我覺得係條紅線踩到香港,借住紅線嚟踩香港嘅言論自由。1964年馬丁路德金遇弒身亡,但留低好多嘢畀我哋,其中一句今日啱用,最大悲哀不是惡人惡言相向,是好人過度沉默。我哋唔會沉默,你踩到戴,就係踩到我哋嘅紅線,我哋一定同你抗爭到底。

毛孟靜

當權者對戴先誣諂、後批鬥,百分百文革手段。

陳志全

今日是言論自由日,29年前1989年鄭南容為言論自由自焚而死,近年這離港人很近,每個捍言論自由的人都值得支持。香港人企硬!

范國威

對戴打壓是文革、上綱上線,今日話紅線,明日話底線,要將港人一網打盡,今日要撐戴、言論學術自由和港人。

張超雄

戴話最大罪名係俾大家想象未來,呢個未來將會係見到咁大國家唔會再被一個黨專政。我哋渴望社會有民主自由,唔會俾一個黨專政我哋所有人嘅生活。

李卓人

最近成日講紅線,但香港人、我哋都有我哋嘅紅線,紅線唔係共產黨嘅專利,我哋嘅紅線係言論學術自由、示威自由。最近電視成日見到一個女人,呢個女人令我諗起另一個更衰嘅女人,四人幫邊個係最衰,我想同林鄭講:唔好衰收尾變江青啦。


《蘋果》沙士15周年系列網站,正式登場:
https://hk.feature.appledaily.com/sars15

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載