› 選擇地區
三藩市
紐約
洛杉磯
其他美國地區
香港 台灣 北美
 
2018年02月19日

【八方相當年】林正財那些年 過年會摘炮仗花

建立時間 (HKT): 0219 06:30

新正頭,最緊要好意頭,狗年【八方相當年】首位主角,就係個名「又正又財」好有新年feel嘅行政會議成員林正財。個名咁好意頭,究竟出自邊個手筆?佢話已經無從稽考,因為父母唔識字,當年喺博愛醫院出世後要改名,有人就提議「正財」,「媽媽聽落覺得幾好吖,正正當當咁搵錢」,於是就取名「正財」。

相關新聞:【李八方online】英領事館賀年片得2秒hea爆 美帝有heart好多

父母總希望仔女出人頭地,一個名字也是一個寄望。今年57歲嘅林正財出身貧苦,自幼住喺錦田吉慶圍附近泥屋,「以前過年好凍,衫都唔夠著」。父親做三行散工,後來遇上交通意外,唔能夠工作,由母親打住家工擔起一頭家。家中有六兄弟姊妹中,佢排第四,但遺憾一個家姐喺一次水浸中不幸過身。

「窮到連水果都冇得食,過年先有得食。」林正財仲記得,以前過年,父母都將最好嘅食物留畀仔女,有時經濟陷困境,連壓歲錢都負擔唔起,「最窮嘅時候,只得紅紙一張」,但佢明白家境,所以唔會同人比較。每逢過年,佢就走去吉慶圍前嘅空地,睇人燒炮仗,玩穿雲箭,「由年三十晚通宵燒到年初一,成地都係炮仗碎,紅噹噹」。

相關新聞:【李八方online】乜狗最難畫?范國威神回:X X!

對林正財而言,童年時過年最大娛樂,莫過於跑到屋企後面嘅大宅,爬過紅色大閘入去摘炮仗花,「大力拍就會響,當做炮仗」。但佢最記得住喺大宅嘅獨居婆婆,過年都會請吃糖果,每逢暑假,亦會託佢幫忙到花園執石仔,「每次都會畀幾毫子」。直至長大後,佢回頭再想,先明白點解石仔執極都有,「可能婆婆每次都倒番出嚟,其實係想畀錢我哋使,相信係佢嘅心意」。

自幼已明白凡事冇不勞而穫,林正財努力考上大學,成為兒科醫生,現時亦係安老事務委員會主席。雖然事隔數十年,佢對婆婆仍心存感激,所以趁新春佳節,希望新一年社會繼續和諧,多啲關心老人家。佢仲話自己好鍾意食中國傳統食品,蘿蔔糕、煎堆同角仔樣樣啱,雖然太熱氣,但好在佢每周都踩200公里單車,試過農曆年假,3日就達標,難怪身型fit爆。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載