蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年02月11日

【聽我講…】極熱血!大學生FF「拗手瓜擂台」變事實

18,344
最後更新: 0211 12:28 / 建立時間 (HKT): 0211 00:01

「咁認真拗手瓜,會唔會好笨?」網上有口痕網友挑機。別人眼中的傻事,22歲的鄺梓文聳聳膊,重燃一團火,他說千金難買。「我唔係隊中最強,但成為推手,就係我嘅存在價值」。這個手瓜起展的科大數學系4年級生,一年前透過網絡尋人,由零開始在港創辦「香港腕力協會」,以公園涼亭作起點,拗手瓜會友,成員包中學生、老師、社工和扎鐵工,還認真到帶隊北上參加公開賽。「將FF變現實,係好美妙」。這是一個由尋人開始的熱血故事,也是一個勇敢打擂台,誠實面對自己的故事。真正男人的浪漫,豈枝竹火腩飯可比。

記者 呂麗嬋

星期六早上,山林道一間樓上健身中心,擠滿手瓜起展大隻男,先來握拳、拉展手掌熱身;再來是舉重、拉手帶等力量訓練。「冬天天氣凍,唔熱身易拗柴」。鄺梓文解釋。一字排開的大隻男,似山寨兵團,但人人一面認真。「初中已成日同人拗手瓜,有次喺網上睇到新加坡腕力協會成立嘅訪問,嗰創辦人只大我一歲,我問自己點解人哋做到我做唔到?」坐言起行,以中英文谷哥,眾裡尋他。「嗰時搵到深圳都有個拗手瓜會,上去諗住取經,點知嗰邊話,啱啱先有兩個香港人上過嚟!」

這便是後來成為協會副會長的阿宗及阿偉。上網看同一帖文,前後腳北上,成就三個大隻男「命中註定的相遇」。「回港開面書專頁,竟然有唔少人主動聯絡,唔係行出咗第一步,你都唔會知原來拗手瓜,咁多人有興趣」。充滿剛陽味的眾裡尋他遊戲,聚集了20幾人。「當初諗住喺樓下公園一齊拗吓手瓜玩吓,無諗過有健身中心慷慨俾地方我哋訓練,大家又會組隊出外比賽,仲會有記者因為拗手瓜訪問我哋,唔係話有幾了不起,但發展已經係喜出望外」。

今日手瓜起展,以為自小已是體育健將,但原來那些年,當鄺梓文仍是小學雞,他形容自己是喜歡思考的肥仔科學迷,是那種媽媽帶他接受智商評估,被評定為資優兒童,自覺與別不同的小小高材生。「細個好肥,鼻敏感又嚴重,你諗吓,一個成日流住鼻涕的肥仔,又鍾意同人講啲懶深奧嘅嘢,啲同學仔會有幾唔耐煩」。少年時代,總希望得到同輩認同,升上中學,他發現說話無同學愛聽,但和人拗手瓜卻總是贏,勤去健身室,為減肥,也為拗手瓜,愈練愈大隻。

「中學係拗遍學校無敵手!」升上大學還行,直至他成立「香港腕力協會」,以為自搭舞台大有發揮,殊不知才發現,人生原來不是總是贏。早前他首度帶隊北上廣州參加公開賽,與國際級健兒公開較量,阿宗及阿偉就先後摘下不同級別賽事的冠軍及亞軍,反而是他這個領隊空手而回。「出外比賽,你會見到天外有天,但同時亦會發現,身邊好多人就算非職業選手,天賦亦比自己好」。他說:「就如搞呢個會,覺得呢項運動可以發揮,但當你發現已好努力,但其實自己未必咁勁,就會自我質疑」。

「不上擂台永遠不會輸」是硬道理,但鄺梓文卻說寧願全力以赴,誠實面對自己。「每個人都有個自我保護機制,考得唔好話俾自己聽:我未盡力啫」。不逃避,他選擇對自己殘忍提問:如果只鍾意贏,贏唔到就放棄,有咩資格話你係真心鍾意拗手瓜?「有段時間係好糾結,依家會諗,如果我可以啟發到有潛質的人,令佢哋有機會玩到呢項運動同出外比賽,就算我唔係隊中最強,但能夠成為推手,就係我嘅存在價值」。

自言性格不算感性,但鄺梓文說永遠不會忘記與他眼中「香港最強」的阿宗,在書展的一席話。「佢話DSE考得唔好,好迷惘,唔知條路可以點樣走落去,諗過求其搵份工,Part Time又好,政府工又好,得過且過,自從搞呢個會,重新發現自己嘅興趣同強項」。其時阿宗尚未成為健身教練,而是在地盤扎鐵。尋常的對話,令他好觸動,覺得自己好似無端端「俾咗一樣好正面嘅影響其他人」。

成就他人的滿足感,超越一開始追求自我滿足的層次,亦讓畢業在即的他,認真反思自己的前路。「細個想做科學家,考入科大讀數學,好大程度係呢科考得比較好」。成年人說揾食,學生揀科要睇餸食飯,「搞呢個會,令我重燃心中一團火,同戰友一齊構思創造,經營一樣嘢,做咁多年人讀咁多年書,就算讀到大學,好多嘢都係社會鼓勵我去做,第一次活生生係自己想做,戰友之間啟發一齊去做」。行出第一步,其實有無限可能性,第一個也是香港唯一的拗手瓜會,將FF變現實,原來真的好美妙。

鄺梓文(右)與阿偉,因拗手瓜結緣老友鬼鬼:「影得我哋靚唔靚仔係其次,手臂緊要過我個樣!」哥兒倆一拗手瓜就出盡力,擂台下一唱一和插科打諢,默契十足。(陳海威攝) 鄺梓文(右)與阿偉,因拗手瓜結緣老友鬼鬼:「影得我哋靚唔靚仔係其次,手臂緊要過我個樣!」哥兒倆一拗手瓜就出盡力,擂台下一唱一和插科打諢,默契十足。(陳海威攝) 創辦「香港腕力協會」,重燃一團火,22歲的鄺梓文說千金難買。「我唔係隊中最強,但成為推手,就係我嘅存在價值」。(陳海威攝) 創辦「香港腕力協會」,重燃一團火,22歲的鄺梓文說千金難買。「我唔係隊中最強,但成為推手,就係我嘅存在價值」。(陳海威攝) 先來握拳、拉展手掌熱身,再來是舉重、拉手帶等力量訓練,一字排開的大隻男,似山寨兵團,但人人一臉認真。(陳海威攝) 先來握拳、拉展手掌熱身,再來是舉重、拉手帶等力量訓練,一字排開的大隻男,似山寨兵團,但人人一臉認真。(陳海威攝)
創會三劍俠:鄺梓文(中)、阿宗(右一)及阿偉(左一)。(相片由被訪者提供) 創會三劍俠:鄺梓文(中)、阿宗(右一)及阿偉(左一)。(相片由被訪者提供) 「香港腕力協會」最初只山寨式運作,以公園涼亭作起點,拗手瓜會友,成員包括中學生、老師,社工和扎鐵工。(相片由被訪者提供) 「香港腕力協會」最初只山寨式運作,以公園涼亭作起點,拗手瓜會友,成員包括中學生、老師,社工和扎鐵工。(相片由被訪者提供) 睇網上比賽與親身感受是兩回事,鄺梓文說現場可感受氣氛,與職業選手交流,難能可貴。(相片由被訪者提供) 睇網上比賽與親身感受是兩回事,鄺梓文說現場可感受氣氛,與職業選手交流,難能可貴。(相片由被訪者提供)
「阿宗唔係地上最強,都係香港最強」。鄺梓文說。協會首次組隊出外比賽便奪三獎,阿宗(右一)在右手80公斤組別奪冠,被評為明日之星。(相片由被訪者提供) 「阿宗唔係地上最強,都係香港最強」。鄺梓文說。協會首次組隊出外比賽便奪三獎,阿宗(右一)在右手80公斤組別奪冠,被評為明日之星。(相片由被訪者提供) 「將FF變現實,係好美妙」。認真做別人眼中的傻事,這是一個由尋人開始的熱血故事,真正男人的浪漫,豈枝竹火腩飯可比。(相片由被訪者提供) 「將FF變現實,係好美妙」。認真做別人眼中的傻事,這是一個由尋人開始的熱血故事,真正男人的浪漫,豈枝竹火腩飯可比。(相片由被訪者提供) 那些年的鄺梓文,是喜歡思考的肥仔科學迷,是那種媽媽帶他接受智商評估,被評定為資優兒童,自覺與別不同的小小高材生。(相片由被訪者提供) 那些年的鄺梓文,是喜歡思考的肥仔科學迷,是那種媽媽帶他接受智商評估,被評定為資優兒童,自覺與別不同的小小高材生。(相片由被訪者提供)
有香港機舖早年就曾由日本引入拗手瓜機,讓人同機器孤獨玩,結果斷手無數,被迫回收。 有香港機舖早年就曾由日本引入拗手瓜機,讓人同機器孤獨玩,結果斷手無數,被迫回收。
蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載