蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月24日

【李八方online】郭炳聯任全國政協 新地林鄭治下大翻身

7,241
新地喺娥特治下大翻身,郭炳聯獲任全國政協委員。蘋果日報
建立時間 (HKT): 0124 17:44

一連三日嘅全國政協常委會今日閉幕,投票通過新一屆政協名單。港區有幾多委員上榜,連日已經有唔少名字公開咗,但原來好戲在後頭,八方聽聞名單上有個政協委員名字,好令人注目,就係新地主席郭炳聯。查實喺2012年新地案爆出前,郭炳聯本身都係北京市政協,連同原任全國政協常委嘅大哥郭炳湘同上海市政協嘅二哥郭炳江,統統喺換屆之時全部被OUT。

相關新聞:【李八方online】一個主席序言 看清曾鈺成同梁君彥之別

事隔幾年,郭炳聯脫罪兼夾梁振英落台,郭家終於大翻身,除咗郭炳聯獲任全國政協,郭家第三代郭基煇同郭基泓,分別係廣東省同北京市政協,即係南北通吃之餘仲要直達天庭,喺娥特治下可謂吐氣揚眉。新地喺去年特首選舉力挺林鄭,集團公共事務總監李鑾輝仲任林鄭助選團主將,唔知呢場勝仗喺阿爺心目中,有冇分加?

新地喺政協換屆大豐收,但另一個地產商相信有啲失落。新世界主席鄭家純同九倉前集團主席吳光正,分別因為年齡問題要卸任全國政協常委,通常呢啲國家任務,大家都好想子承父業,但似乎唔係個個都得。

八方聽聞,吳光正囝囝吳宗權榜上有名成為政協新丁,但鄭家純公子鄭志剛卻未能爭到一席位,香港呢五大地產商家族中,由於長和系有李澤鉅、恒地有李家傑,換言之只有新世界喺全國政協特邀港區名單無第二三代做代表。

吖,當年純官由撐唐唐變為改挺CY後,新世界喺好多範疇都有餅仔分。梁下林鄭上後,全國政協都要缺席,世事發展,往往出人意表。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載