› 選擇地區
三藩市
紐約
洛杉磯
其他美國地區
香港 台灣 北美
 
2018年01月01日

【八方相當年】周庭水著照曝光!入水能游 出水能吹

最後更新: 0101 15:44 / 建立時間 (HKT): 0101 00:15

2018年度政壇熱爆女新人係……雖然今年啱啱開始,但最終結果大概估到!21歲嘅香港眾志周庭料喺3.11港島區補選出征,如果勝出就係史上最年輕立法會議員,試問又點會唔係今年人氣王?既然係咁,八方當然率先介紹返。除咗愛日本動漫自詡宅女外,周庭查實周身刀,游水吹笛樣樣啱,點只學民女神咁簡單?

「我細細個成日跑嚟跑去,好鍾意游水,兩歲半就去學」,自稱宅女嘅周庭原來係「水怪」,最叻係背泳同蛙式,小學係校隊,除咗喺校際比賽自由式接力賽攞過第四,亦喺泳會賽事奪過金,而佢係鍾意游泳池水而唔係去沙灘,「泳池嗰種獨有味道、嗰種質感,由細到大我都好鍾意」。

父母要佢學游水,因為覺得浮水係生存技能。係校隊就要練水,會唔會唔夠時間讀書?佢話呢兩樣嘢冇關係,覺得若然只係埋首讀書,都唔係好事。

喺嘉諾撒聖家書院讀書時,入水能游出水能吹……講緊吹長笛啫。話說周庭同時好鍾意古典音樂,小學到中學都喺管弦樂團吹長笛,但查實佢小一時想學嘅係小提琴,「覺得好型」,點知課程滿額,長笛班反而有位,結果退而求其次,「學學下覺得非常好玩,好好聽,好適合我」。佢話小學同時有學鋼琴,但都係鍾意長笛多啲。

至於日本文化,小六開始有興趣,當時係睇日本動漫,亦迷日本明星,之後大咗就睇綜藝節目、亦開始關心日本嘅新聞,「如果唔係接觸日本文化,我都唔會去學日文、亦唔可以飛去日本受訪。」越大亦越關心社會時事,15歲時見到有班年紀相若嘅年輕人成日上街反國教,「咁就上網睇下『國教』係乜、學民思潮搞緊乜,睇完覺得個國教指引真係唔可以接受,亦覺得作為社會公民一份子,都要為社會發聲。」

結果中四時入咗學民,一頭長直髮嘅清純少女LOOK深入民心,「但其實我小學到初中,都係留咗冬菇頭,成個小丸子咁,因為阿媽話短頭髮好啲,大啲先至留長頭髮咋」,佢提供嘅舊照中,就包括冬菇頭嘅水著照!而現時喺浸大讀緊政治及國際關係嘅佢,唔知3.11後會唔會喺學生外多一重身份?


【minigame】2017瘋暈人物 返工打機唔使擇日
http://bit.ly/2CeWQkP

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載