蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年12月19日
馬上成為壹會員

【人大選舉】教聯會歷史性出局 經民聯有進賬打孖上

建立時間 (HKT): 1219 11:50

人大選舉完咗,11位新丁成功當選,政黨政團嘅人大勢力亦大執位,老牌愛國教育團體教聯會,黃均瑜竟然接唔到楊耀忠班,排第38位歷史性出局,令唔少政界跌眼鏡,工聯會鄭耀棠同吳秋北成功連任,民建聯亦有葉國謙及譚耀宗當選,可謂平分秋色。

相關新聞:【人大選舉】陳曼琪話「急」最終勝出 鄺美雲當選:人人有書讀

經民聯都算今次選舉贏家,洪為民同張俊勇打孖上以新丁姿態當選,其中張俊勇上屆無喺祝福名單時,都試闖過人大戰場,但只能排喺候補名單,今次名正言順獲西環點燈,成功機會自然高好多。

自由黨今次就慘淡收場,上屆有劉健儀唯一人大代表,今屆由律師會嘅陳曉峰上陣,陳曉峰加入自由黨嘅黨齡好淺,加上知名度喺左派圈子未算高,選情未見穩陣,雖然都好努力出席各大大小小選舉論壇,但都未能一擊即中,今次得票排37,僅僅以不足90票飲恨,無緣擠身36席。

相關新聞:【人大選舉】星爺曾志偉李嘉誠現身 4特首同場煲呔有份投票

陳曉峰選舉後話,即使落敗仍會繼續服務社會,做好香港、做好國家「邊度跌低係邊度企起身」。被問到是否自由黨的身份會否令他落選,他指,自由黨過去給予很多支持,不同意自由黨是建制派「曳仔」,又指不能當選是個人的錯失,不關自由黨事。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載