› 選擇地區
三藩市
紐約
洛杉磯
其他美國地區
香港 台灣 北美
 
2017年11月23日

【李八方online】區議會傾「沙灘限奶令」 搞清潔要清埋性感泳衣

建立時間 (HKT): 1123 00:10

最近大台CCTVB出「限奶令」,要一眾女藝人封胸,莫講話市民,有啲藝人都摸不着頭腦,究竟大台搞邊科呀?大家千祈唔好笑呀,事關限奶令不限於大台,最近有區議員都好關注呢個問題,甚至提到區會層面,要求討論。

相關新聞:荃灣區會傾沙灘「限奶令」 泳客:唔係掩住眼就教育到小朋友

話說荃灣區議會下星期二(28號)就舉行大會,區議員鄒秉恬就要求喺當日討論佢嘅限奶令。是咁的,佢畀區會主席封信度話,今年荃灣區搞沙灘清潔活動時,發生咗啲令市民同參加者尷尬嘅事,令市民覺得主辦單位派紀念品個陣唔公平兼有歧視女性問題。

於是鄒秉恬就喺區會動議,強烈要求康文署配合荃灣區會嘅活動需要,將來搞沙灘清潔嘅時候,暫時禁止着性感泳衣嘅男女進入沙灘,而活動舉行前15分鐘更加要呼籲、協助啲着比堅尼或G弦泳裝嘅市民離一離場,話因為現場會有好多家庭參加,驚感觀上猥褻意識不良,可能影響兒童長遠心智成長咁話。

不過之後鄒同傳媒講,其實呢個係曲線提議,事源上次清潔運動嗰陣,現場有比堅尼女想同嘉賓合照,在場攝影師竟然以衣著有問題為由唔肯影,該女士投訴大會歧視女性,所以佢先特登提出趕性感泳衣男女離場方案,諷刺大會思想封閉喎。信不信由你喇!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載