蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月10日

【777同鄉會】潮州幫坐大添馬艦 溫泉之鄉都出產局長

24,396
最後更新: 0910 15:24 / 建立時間 (HKT): 0910 00:04

新一屆政府埋班工作兩個幾月,市民對於部份問責司局長,相信仍然感到面目模糊,但始終對中國人嚟講,做官都係光耀門楣,八方數一數,睇下邊個地方專出香港特區領導?唔講大家可能無留意,香港先後4位特首,兩個都係浙江舟山人,分別係首任特首董建華及首位女特首林鄭月娥。原來「佢都係我同鄉喎」,難怪阿董喺特首選舉時強勢撐奶媽,不停「董抱抱」。

至於3司13局,依然係潮州幫最人多勢眾,財政司司長陳茂波、商經局局長邱騰華同食衛局局長陳肇始都係「架己冷」。其實上屆政府都係潮州幫天下,除咗上述3位前朝過渡嘅官員,食衞局前局長高永文都係潮州人,但就冇嗰種怒漢feel。香港有成六分一、即逾百萬人祖籍潮州,結果又唔太令人意外嘅!

其實香港大部份人祖籍都係廣東一帶,所以官員要喺班子中搵同鄉都唔係難事,好似律政司袁國強同教育局局長楊潤雄,兩位都係東莞人;至於順德人呢,都係有兩位,除咗環境局局長黃錦星,另一個就係民政局局長劉江華嘞。嗱嗱嗱,順德人係咪真係好順得人?大家點睇劉江華嘅為人?

至於政務司司長張建宗同公務員事務局羅智光,一個係惠州、一個係惠陽。運房局局長陳帆祖籍湛江、勞福局局長羅致光則係三水人、發展局局長黃偉綸同保安局局長李家超,分別屬南海九江同番禺。而政制局局長聶德權嘅鄉下呢,則係陳茂波都推介去旅行浸溫泉嘅恩平喇,唔知三耳局長,有冇去試過?

局長中都有兩位外省人,創科局局長楊偉雄祖籍湖南寧遠,財庫局局長劉怡翔則係江蘇人,同林鄭一樣係廣東外嘅「非我族類」!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載