蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年08月27日

【李八方online】拆解白襪仔的秘密!第一先生:我唔鍾意著襪

35,183
最後更新: 0827 23:33 / 建立時間 (HKT): 0827 17:43

【新增動新聞】
特區「第一先生」、特首林鄭月娥嘅丈夫林兆波今日為一個喺公開大學搞嘅數學講座做主持,佢開始前接受八方訪問,對於近日林鄭月娥民望有所上升,身為丈夫點睇?「第一先生」對呢個問題,一時為之語塞,可能如浮雲嘅民望,數學幾叻都計唔到升跌,定係驚答錯問題,返到屋企要罰扭耳仔?

林兆波定過神後細心解構,話民望好易受到一兩件事影響、波動可以好大,民望當然重要 ,但唔能夠擺太多精神,因為有時不在當事人控制之內,形容呢屆政府前路仲係困難重重,「大家留意嘅好多事情,都唔係喺呢屆政府控制之內,前路相當困難。」

咁太太有冇同佢分享工作上嘅壓力呢?林兆波就話,壓力肯定有,老婆唔講都知。八方問佢點樣睇得出?佢就話:「我見佢嘅時間好少㗎咋!佢又多應酬,又多開會!」點解唔跟下林鄭出trip?林兆波貫徹始終話想保持低調,難怪一個公職都冇做。

唔少人記憶猶新,記得林兆波喺太太七一宣誓就職當日以一對小白襪力壓全場,搶晒焦點,林兆波一被問到點解「白襪一疏」時笑晒回應:「其實報道兩邊都有,(話你純情喎?)一個話純情,亦都有人話唔啱規矩。其實都係得啖笑。(你自己介唔介意?)第一眼睇到,如果係批評,個個都好自然覺得『使唔使咁講呀?』,但其實諗深一層,其實有乜所謂,得啖笑啫。」

林兆波話大家只要睇下佢嘅衣著,就會知道佢冇乜講究,「舒服就得」。咁係咪鍾意著白襪先?今日著K-Swiss白波鞋搭灰襪仔嘅林兆波自爆小秘密:「其實我唔鍾意著襪㗎!」,佢仲話自己有次喺地鐵睇英文報紙,但冇著襪,畀人影到,仲上埋《蘋果日報》添呀!

至於點解今日肯出席數學講座做主持?佢話個講座教授同佢好熟,雖然好忙,但老朋友叫到,咪幫手做主持:「數學係我嘅摯愛,除咗我老婆同我兩個仔之外。三個都係我摯愛。」佢話今日打風,原本以為講座會取消,令佢可以瞓到下晝四點,點知個風走得咁快。

對於近日有16位年輕人被判囚,林兆波話自己好同情啲後生仔,但法庭亦有佢嘅理據,「佢哋後生仔或多或少有衝動,佢哋覺得要做一啲嘢,我都好同情佢哋。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載