蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年08月21日

【八方相當年】曾健超做過空少 又係陪朋友面試?

10,752
建立時間 (HKT): 0821 08:01

由空中少爺到做社工,再由社工轉跑道從政,繼而因為佔中掀起波瀾,曾健超(Ken)嘅人生路,似乎唔算好平坦,而原來佢由細開始,已經因為家庭問題,學識獨立自強。

現年42歲嘅阿Ken有個妹妹,細個住九龍區,小二搬入屯門,父母喺佢14歲時離婚,佢同妹妹亦因此分開住,中四時佢更加搬咗去同學屋企住,嗰時已經學識要獨立。由於屋企都唔多照顧佢,佢話自己細細個都幾曳,但好在有返教會,終究令佢嘅路冇走歪;讀書成績只係一般,「尤其是中四、中五嘅『動盪期』,嗰時我仲啱啱搬咗出嚟住」。

可能小學已經做童軍,令佢更識得自力更生,亦因為好多訓練,令佢大個咗都敢於挑戰,「攀山涉水難唔到我,bungee jump等乜都夠膽玩。」

香港樹仁學院讀新聞系,亦有理工大學社會工作文憑;1997年做過學聯常委,主權移交前後嘅大時代,當時都一腔熱血一團火,阿Ken話年少時已經想改變社會、改變香港,曾經喺民主黨位於堅道嘅中西區辦事處做暑期工,幫阮品強、鄭麗琼同甘乃威等地膽嘅手。

點解無厘頭會去做咗做空少?唔通又係嗰啲港姐陪人去面試,人哋唔得你得咗啲friend?「係呀,我真係陪一個朋友去面試,結果佢唔得我得。」阿Ken當年其實係喺紐西蘭國際太平洋學院讀緊國際關係研究,趁假期返港時陪朋友去國泰面試,「都想睇下個世界,好樂意接受不同挑戰」,結果朋友唔得佢得咗,一做就做咗三年空少,好記得沙士爆發期間個機艙有幾吉,亦試過同內地搭客講英文,畀對方以普通話狂鬧係咪睇唔起佢?

做外展社工時要經常喺網吧同機鋪執仔,同年輕人同聲同氣一定冇得輸,阿Ken打機有一手,好多時由此同佢哋打開話匣子。之後入公民黨又參選過,其後辭工去南美遊歷,阿媽喺最後一個月加入旅程,點知佢當時聽到香港爆發雨傘革命,「即刻改機票返嚟,掟低咗阿媽自己一個,佢都應該嬲嬲哋~」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載