蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年07月17日

【八方相當年】鄭泳舜好「打」得 同鬼仔化干戈為玉帛

7,002
建立時間 (HKT): 0717 07:03

揹住保良局前主席鄭錦鐘公子呢個身份,民建聯深水埗區議員鄭泳舜(Vincent)都幾頭痕,因為有個富爸爸,成日被懷疑打唔打得?查實佢同唔少普通人一樣,經歷過屋邨仔時代,事實上亦好「打」得,皆因佢籃球、排球、羽毛球乜都啱。中四隻身赴紐西蘭讀書,試過有鬼仔向佢掟嘢兼吐口水,最終亦係靠「打」,化干戈為玉帛。

37歲嘅Vincent憶述細個住深水埗南山邨時,老竇參與好多社區活動,佢經常跟住四出做義工。細個唔多like讀書,成績自然好普通,自爆無「波」不歡,「但就完全唔識踢波」。

中學時搬咗去屯門,中四遠赴新西蘭升學,最初半年獨自住喺當地家庭,「當時真係有啲唔慣,生活習慣唔同又要講英文」,當時嘅佢仲好少男情懷,對中學同學依依不捨,「好唔捨得啲同學,嗰時又冇上網、打電話又好貴,幾乎日日寫信畀佢哋,男男女女都寫,到而家都有keep住同呢班同學聯絡。」

初嚟步到嘅黃皮膚新生,不時會被當地學生欺負,Vincent憶述當時都有種族歧視,試過有人突然向佢掟嘢兼吐口水,但佢最終一一化解,「我鍾意運動,就多啲同啲同學一齊打波,打打吓就熟絡咗」。

新西蘭奧克蘭大學讀統計學,原來Vincent一向愛數學;畢業後喺03年回港,碰上沙士經濟狀況奇差,「第一份工喺廣告設計公司做,好記得當時得嗰8500蚊人工,仲要成日中港兩邊走,可能畀人搵笨,哈哈。」之後轉工做商場租務同管理,一做三年幾。點解唔幫爹哋做生意?「係男仔都想自己闖下天下嘛!」

因為喺深水埗區做義工,識咗當時係民建聯九龍西議員嘅民建聯創黨主席曾鈺成,2006年入黨、2007年當選深水埗區議員至今,最近勝出黨內遴選,或代黨披甲迎戰稍後舉行嘅立法會九龍西補選,唔知身為胡杏兒姐夫嘅佢,有乜秘訣殺出重圍?

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載