蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年06月17日

【李八方online】馬龍開禪意水墨畫展 胡官余大狀都捧場

4,569
馬龍...吖,馬星原至真,唔畫政治漫畫畫禪意水墨畫,聽日起至8月初有得睇。(王心義攝)(蘋果日報)
建立時間 (HKT): 0617 19:29

平時大家接觸馬龍嘅作品,通常都係政治漫畫,透過諷刺時弊,為大家消氣兼出氣,但查實馬龍都有畫其他畫㗎!

聽日(18)起至8月5日,九龍灣宏光道億京中心嘅香港佛光緣美術館會舉辦「馬星原禪意日常水墨畫展」,展出以簡樸筆法,融注日常意趣,帶有禪意嘅畫作。馬星原開畫展,唔係馬龍喎?大家真係有所不知,馬龍就係馬星原,兩個都係筆名唔係真名。

馬龍今日傍晚為畫展揭幕,捧場主禮嘉賓好多,包括退休法官胡國興、民政事務局副局長許曉暉同公民黨余若薇等,馬龍致辭時多謝各路有心人,解釋馬星原呢個筆名約30年前主要用嚟畫插畫,「有時好少留名,逗咗稿費就算,所以呢個筆名唔算流行」。

而佢特別用馬星原筆名畫禪意水墨畫,係想同以馬龍筆名畫嘅政治漫畫分隔下,唔想當中畀人咁多政治鬥爭感覺,保持初心,純真一啲,一如禪意,回歸本源。佢笑笑口話呀,唔少人真係稱呼佢做「馬生」,但查實佢本身姓袁,結果取諧音改名「馬星原」,「馬姓袁,效果都唔錯吖」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載