蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年05月21日

【回歸廿年】「港獨」之母?劉慧卿:我一直支持自決

57,462
最後更新: 0521 11:16 / 建立時間 (HKT): 0521 00:04

「我仲未當選議員之前,已經支持自決,我自己支持,亦都覺得應該(自決)」。這句話並非出自本土派年輕議員之口,而是來自今年已65歲的民主黨前主席劉慧卿。劉慧卿直言回歸前已多次提出香港「自決」、「全民制憲」等主張,無奈未獲當時主流民意支持而告吹。回首香港回歸後的民主路,雖然崎嶇,但這位香港自決先驅坦言,「幾難搵到」比民主回歸更好的路線,她寄望未來港人能有共識,可以有代表與中央談判2047年後香港前途。

英國前首相戴卓爾夫人於1984年簽訂《中英聯合聲明》後訪港,當時劉慧卿是記者,在記者會上當面質問鐵娘子:「你簽咗協議,將500萬香港人交畀共產政權,道義上講唔講得通呢﹖」30多年後,劉慧卿接受本報訪問談及這段往事,直言個人從不認同「民主回歸」,至今仍支持香港「自決」,而不是「民主回歸」,「我咁多年都冇提民主回歸,現時都唔會提,我提的就係希望香港人可以選出自己的政府。」她當年提出由港人全民投票,決定是否接受聯合聲明,無奈主流民意不接受,「當時事實擺喺度,係香港冇人要去爭取呢樣嘢」。

■盼再有港前途「大談判」

倡議自決是否接受聯合聲明失敗,劉慧卿未放棄香港「自決」想法。1996年她創立前綫,反對只由中、英兩國商討《基本法》,提出「全民制憲」,「香港人應該有份寫(《基本法》),寫完再畀全民投票」,可惜有關建議同樣未獲主流社會支持,說到此處,劉慧卿不禁苦笑說:「好多香港人覺得要搵啲實際嘅嘢,有時都冇辦法,有時你都要向現實低頭。」

面對一次又一次爭取自決失敗,劉慧卿也不得不承認,現實上「幾難搵到」比民主回歸更好的民主路線,可獲主流民意支持,對於近年「自決派」成功冒起,更有代表晉身立法會,劉慧卿認為要「歸功」特首梁振英,指在梁治下令年輕人對前途失去希望,加上梁破天荒在施政報告點名批港大學生會刊物《學苑》,「佢(梁振英)一提起就全世界搵嚟睇,變成洛陽紙貴,所以係佢搞起(自決)」。

面對自決力量再現,劉慧卿把推動自決希望,放眼在2047年。她認為香港已回歸廿年,未來8至10年發展十分重要,期望再展開一場如當年中英談判般的香港前途「大談判」,「我相信係要香港有代表,香港自己有共識,然後說服中央亦有代表同我哋去談判,講一講香港2047後的安排」,認為若中國於2047年已有民主、自由、法治,「咁咪一國一制囉,但如果(中國)未有,大家想繼續一國兩制,係咪要有新基本法,咪畀香港人自己傾出嚟囉」。 

記者 林俊謙


97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載