蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年05月09日

西九龍中心爆公關災難!逼遷雪糕小店仲出寸嘴po 終刪帖道歉

248,785
最後更新: 0509 20:19 / 建立時間 (HKT): 0509 00:04

【新增內容、新增動新聞】
深水埗西九龍中心爆出「公關災難」﹗在該商場8樓經營約一年的雪糕車仔檔「Ice Cha Cha」,以5蚊2球雪糕成功吸引大批食客光顧,車仔檔前經常大排長龍,但早前突收到商場通知不獲續租,料本月中結業,事件傳出後多間傳媒訪問「Ice Cha Cha」,食客深感惋惜,網民懷疑是被其他店舖投訴才有此下場,並批評商場不仁,但其中一間傳媒卻訪問商場內同樓層另一間雪糕店「雪糕達人」,此篇訪問昨被西九龍中心轉載在商場官方facebook,fb小編借此替「雪糕達人」宣傳,更留言指「『鍾意幫襯小店』嘅你,記得幫襯啦~!」此做法即引來猛烈批評,大批網民給「嬲嬲」,而帖文今日已被刪除。但網民繼續在其他帖文「狙擊」,有人直指「刪左po就當無野呀?」,要求交代。

相關新聞:【話你知】fb寸嘴譏被逼遷雪糕店 西九龍中心咩來頭?

至今午1時許,西九龍中心在facebook發新帖致歉,指編輯昨於facebook出現「具爭議性的言論」,引起網友對近日新聞的關注及討論,稱如造成任何不安、困擾及不良影響,向各商戶及網友說「對不起」,並承諾會繼續改善服務質素。該帖文又稱西九龍中心從始至終熱愛本土文化,冀獲諒解。

但該帖繼續被網民炮轟,有人直言如要原諒即與「Ice Cha Cha」續租,亦有網民批評西九龍中心「講一套做一套」。

相關新聞:編輯食評|西九龍中心小炒店 抵食夾大件

「雪糕達人」老闆在訪問中稱自己沒有被拒續租,雪糕賣10蚊4球,不設5蚊2球。西九龍中心fb小編就在轉載時落hashtag「#10除4是2點5是常識吧 #5除2都係2點5 #呢間開咗鋪3年啦 #有人話細細個已經幫襯另一間 #但人哋開業只係1年 #dragoncentre #西九龍中心」,又tag一眾訪問了真正被逼遷、真正苦主「Ice Cha Cha」的傳媒。網民怒斥「攞第二間雪糕店出黎,其實好令人反感」,fb小編遭鬧爆囂張、「垃圾小編、垃圾商場」、「啲Hashtag咁黑人憎既,未見過啲公司公關咁差」。

有網民揚言不再到該商場,「點解西九可以咁冇良心 佢咁做等於下戰書俾香港人」、「未見過啲財主咁小家,祝小編他朝君體也相同」。「雪糕達人」的老闆也被批評「個球咁細都夠pop串人哋,食屎喇」。「公關災難」爆發後,「雪糕達人」昨晚在自己fb出po,稱西九龍中fb上載了他的訪問,「被誤會成本公司和另一間雪糕店對立,本店會找8樓另一老闆查明究竟再向大家說明箇中原因,因為本店都不知道發生什麼事,歡迎媒體介入」。

「Ice Cha Cha」負責人Calvin早前在接受傳媒訪問時表示,車仔檔是與母親一起經營的,因年少時家貧,希望人人有雪糕食,「食甜野正面開心啲」,又指雪糕供應商親自向他表示,賣得太平,而商場已向他表明不予續租,5月1日更有商場保安截其排隊人龍,疑阻人光顧他們。

網民留言:
Emily Heiman:低級商場,低級公關
Lee Linc:仆街啦,西九,你等做死場啦
Aiken Young:個球咁細都夠pop串人o地, 食屎喇
Ying Ying Chow:點解西九可以咁冇良心 佢咁做等於下戰書俾香港人
Carol Ho:未見過啲財主咁小家,祝小編他朝君體也相同
Mandy Chang Admin:需要咁暗串人嗎?都比你搞走人地了。好衰!
Stephanie Kwan:攞第二間雪糕店出黎,其實好令人反感。50蚊兩球都有好多人食得起,大家幫襯ice cha cha都係欣賞老闆果份心意。你攞10蚊4球出黎,到底係想幫佢做宣傳定係想斷佢米路,我就真心唔知啦。
Kwan Miu Yin:啲Hashtag咁黑人憎既,未見過啲公司公關咁差
Jim Jim Lam:垃圾admin係咪覺得自己好X好笑

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載