蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年05月01日

【八方相當年】生於師爺世家 黃碧雲以一敵五男?

17,887
建立時間 (HKT): 0501 09:00

一講起民主黨黃碧雲,大家會諗起啲咩?梗係水啦,無論係屋邨鉛水,再到近期促按量收費嘅東江水,碧雲為咗好貼地嘅問題,花咗唔少口水,但原來佢嘅家庭背景,喺家嚟講可算係「離地」,嚟自小康之家嘅碧雲,爸爸喺律師樓做嘢,想當年,即係60年代喎,喺律師樓做嘢好巴閉㗎﹗

58歲嘅碧雲,對上有三個哥哥、對落又有一個細佬,連埋爸爸媽媽,一家七口有五個男士,難怪佢自細就培養出獨立、強悍嘅個性!佢同八方講,雖然佢係屋企裡面唯一嘅女仔(當然唔計媽媽啦),但係啲阿哥細佬對佢都冇話特別照顧㗎,好似食飯咁,一樣係手快就有多啲餸食,手慢就食白飯,可能就係咁,令佢自細就明白所有嘢都係要自己爭取。

碧雲中學就讀九龍真光中學,之後都有以校友身份回母校分享;佢亦係中大宗教研究文學士、中大政治及公共行政哲學碩士,其後喺美國洛杉磯加州大學政治科學哲學博士。

九龍真光中學位於九龍城區,唔係係咪因為咁令碧雲對九西情有獨鍾,自2012年開始做議員以嚟,一直係以九西做據點,事實上佢同九西確係有淵源,話說碧雲爸爸、爺爺都喺律師樓打工做師爺,須知道嗰個年代識洋文、幫律師做嘢已經好犀利,而律師樓有地方畀佢哋住,位置就正正係紅磡,難怪碧雲話佢真正來自九西。

亦因為屋企環境稱得上係小康,所以碧雲爸爸同媽媽都好重視全家福呢回事。碧雲提供嘅一張珍貴相片,就係爸爸喺1965年嘅時候,專登帶埋一家大細去影樓影嘅全家福,當時嘅小碧雲著得靚靚,爸爸同哥哥就戴番頂唐裝帽,睇落碧雲細個個樣仲有啲似馮寶寶喎!

身為學者嘅碧雲,早喺80年代已經開始參與香港民主運動,爭取「八八直選」,有張舊相就攝於1987年,當年民主政制促進聯委會喺中環立法局外集會,爭取立法局88年要有直選,碧雲都身在其中,原來佢大學畢業無耐就遇上中英簽訂聯合聲明,香港進入過渡期,佢都由政治冷感嘅年輕人,變得積極地投入本土民主運動,可惜至今民主都冇乜寸進。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載