蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年04月03日

【八方相當年】法政男神寸寸貢 記唔記得佢拍過邊個廣告

28,741
最後更新: 0403 13:57 / 建立時間 (HKT): 0403 06:30

38歲嘅蔡騏早前接任法政匯思新召集人後爆紅,青靚白淨輕易成為社運圈新一代男神。法政男神唔係浪得虛名,自爆2000年港大讀書時喺街上被星探發掘拍廣告,「我唔驚死咪上去」,試鏡成功兼拍咗處男作,為一間便利店做咗廣告男主角,青澀澀嘅佢喺片中都有「歡迎光臨」、「多謝晒」等對白㗎,但佢笑稱後悔下海,「而家都不斷被舊同學笑㗎!」( https://youtu.be/q21npmBGvK8 )

人人選港姐,都話陪朋友面試,蔡騏就坦承因為貪玩自動獻身,但堅稱都有自知之明,無諗住自此走入演藝圈,原來星探仲問過佢有冇興趣做歌手,「我話唔係呀嘛,我五音不全喎」,之後專心讀書,期間都拍過一啲政府宣傳片!

現為大律師嘅蔡騏就讀於青衣樂善堂梁植偉紀念中學,佢話細個多嘴兼讀書唔叻,中四先嚟發奮,好記得大佢三年嘅家姐會考放榜前問佢,洗唔洗陪佢搵學校?「佢平時好cool又冷若冰霜,所以好感動」,最終成績好原校升學,最終入埋港大讀法律。

而除咗家姐,佢仲有個遲佢十分鐘出世嘅孿生細佬,但完全唔似樣、冇畀人認錯,指細佬運動型係校草,自己性格斯文同佢相反,仲自爆中學時被排擠,「可能寸寸貢、自以為是,太乞人憎」,唔多合群又唔做運動嘅佢,當時只有一兩個朋友喎。

佢仲話那些年係星矢迷,「我係宅男嚟㗎,聖鬥士星矢嘅模型、漫畫書、咭呀、畫集我都有儲㗎」,咁斯文卻迷要戰鬥嘅星矢……蔡騏笑嘻嘻指:「佢哋似一班乸型喺度打交……唔係爆肌型,個個瘦掹掹,好似我咁。」當年都係王菲迷,但最愛都係同樣高瘦型嘅梁詠琪,「佢啲演唱會我全部都有去,生完BB都好鍾意佢,好鍾意佢咁好勝。」

唔講大家未必知,蔡騏喺港大讀書時原來係曾俊華前政助羅永聰嘅同學,佢話自己好少返學,同對方唔算熟絡,但大讚對方係nice guy,至少阿聰唔會唔睬自己,點解?「因為當時有啲同學唔多睬我,見我最後一日先喺圖書館臨急做功課,仲會寸爆我㗎。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載