› 選擇地區
三藩市
紐約
洛杉磯
其他美國地區
香港 台灣 北美
 
2017年01月14日

【法政匯絲】NQ 的自白

(蘋果日報)
建立時間 (HKT): 0114 09:26

好多人都知做律師要經過兩年實習期,過咗兩年之後,就係兩年以來最光榮嘅時刻:正式由「青衣」(trainee) 晉身律師行列。正式成為律師要經過一個由法官主持、莊嚴嘅宣誓儀式(admission ceremony)。由於「青衣」一般係law firm食物鏈嘅最底層生物,所以呢個儀式係有非一般嘅象徵性意義:如果閣下去過朋友嘅律師宣誓儀式,相信都會記得佢當日望落係幾咁神采飛揚、佢爸爸媽媽婆婆公公姨媽姑姐係幾咁驕傲、佢老闆係點樣讚到佢好似一出世就識揸火箭咁。

好喇,咁正式成為咗律師之後又點呢?「青衣」就會改名叫「NQ」,即係newly qualified solicitor。NQ嘅生活係咪大家(註:即係一眾trainee)想像中咁樣「上咗岸」嘅生活呢?等我小NQ慢慢話比各位讀者知。

第一,NQ其實係一個微妙嘅存在。你以前唔可以用律師身分做嘅嘢,忽然你都有authority去做。呢個時候,你會突然發現你好忙,因為會有好多人嚟搵你:你個客會直接打比你問法律問題、你老闆搵你上庭、你啲朋友搵你R free legal advice。跟住,你會發現,原來你係乜X都唔識,因為以前從來未做過。喺你發現呢個可怕嘅事實嘅同時,你個客、你老闆同你啲friend都發現咗。跟住全世界、包括你自己都覺得你好廢。

第二,一個律師嘅責任遠遠唔止做法律工作。其中好重要嘅一環,就係你嘅billable hour(向客戶收費嘅時數)開始成為一個永恆嘅指標,無時無刻令你提心吊膽,因住bill得太少會比老闆照肺又或者「質」去做啲難哽嘅case/project。每日淨係填自己花咗幾多時間喺某個case/project度,其實都已經花咗好多時間。

第三,當你喺底層嘅時候,總係覺得上面啲人好pk。「X!呢啲嘢都叫我做,佢自己做仲快啦。」相信每個trainee都講過呢句說話(喺心裡面)。不過,當你有一兩個畀你差遣嘅trainee時,你又可能會話:「X!咁簡單都做得咁慢,我幫你做埋好無?」如果你甚至會同其他同事抱怨某trainee嘅work quality,恭喜你,你已經畢業成為老屎忽了。

當然,NQ嘅身分的確會帶嚟一啲trainee絕對無嘅權利,我講緊嘅就係法律界選特首(選委)嘅投票權。雖然而家仲未有一人一票選特首,而且有呢一票都係因為一個唔公義嘅功能組別制度,但係今次法律界一致選出真心為香港民主進程努力嘅選委(而唔係某啲無腰骨嘅牆頭草,或者無心做但係有阿爺撐腰嘅參選人),都係因為有呢一票。

仲有一樣,就係成為NQ之後,終於成為律師會成員,有機會參與律師會運作同埋喺大會投票。我小NQ有一個小小嘅心願,就係假以時日,我哋呢啲新仔可以從律師會內部「光復」律師會,令律師會可以真正承擔守護法治嘅職責,洗一洗我哋事務律師往往喺大是大非上沈默不言、只向錢看嘅污名。

最後,祝啱啱qualify嘅各位NQ工作順利,唔好太大壓力之餘,最緊要勿忘初衷。加油!

小NQ @ 法政匯絲

法政匯「絲」-法律界「絲打」,脫下法律界最私密嘅絲襪,同大家赤裸裸 gossip 呢行嘅八卦趣事。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載