蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年10月23日

【宣誓風波】遭主持質疑判官上身 建制律師人身攻擊:你唔好笑得咁恐怖

155,655
最後更新: 1023 17:44 / 建立時間 (HKT): 1023 16:59

特首梁振英借律政司入稟申禁令,阻止青年新政2名立法會議員游蕙禎、梁頌恆再宣誓,並要求司法覆核立法會主席梁君彥是否有權再為二人監誓,經民聯律師莊永燦在《城市論壇》中為政府護航時,多次發表驚人言論(詳見: http://bit.ly/2evw6zY ),主持蘇敬恒亦要多次打斷和提出質疑,要求對方澄清。惟莊永燦在論壇尾聲「爆發」,連主持都鬧,「你(蘇敬恒)唔好笑得咁恐怖啦!持平啲啦好冇?」

相關新聞:【宣誓風波】曾俊華斥不同人拉社會向兩極侵蝕制度 促港人警醒

在論壇尾聲,時間所餘無幾,主持問4名嘉賓對人大若為此釋法有何看法時,莊即搶咪轉移話題,質疑郭榮鏗和鄭宇碩為游梁二人「闖下彌天大禍」辯解。郭榮鏗帶回話題,問莊若政府敗訴,會否提呈人大釋法,莊未有即時回答,轉而解釋為何政府要入稟,批評立法會主席兼其黨友梁君彥堅持為游梁二人再宣誓「係錯㗎嘛!」

主持蘇敬恒隨即打斷他:「即係你係裁判官?」莊永燦面露不悅,「我講出我個理論吖嘛,你唔好笑得咁恐怖啦!持平啲啦好冇?」蘇敬恒為其笑聲道歉:「對唔住吓,嚇親你㖭」,惟莊永燦仍不滿意,「喂!蘇敬恒,持平啲啦,蘇敬恒,持平啲!」

相關新聞:【宣誓風波】雙C齊齊speaking!輪住鬧青政

蘇敬恒向莊解釋為何打斷他,「郭律師係問你,如果法庭判咗政府輸,你會唔會支持政府尋求人大釋法呢?」莊永燦才直認人大有責任解釋《基本法》第104條,「人大釋法係光明正大㗎嘛!」

當城大前政治學教授鄭宇碩指,立法會主席梁君彥讓游梁二人再宣誓,是依先例、諮詢過秘書處和外聘法律顧問的意見,亦得到民意支持時,不時指摘郭榮鏗打斷其發言的莊永燦,竟打斷鄭宇碩的發言,高聲呼叫「民意嘅支持!民意嘅支持!有60萬人譴責呢兩個人!民意嘅支持!」

蘇敬恒提醒莊律師要控制情緒,莊竟反駁:「大事大非呀!蘇敬恒!」蘇敬恒則回應:「大事大非都要控制情緒嘅,唔係大事大非就可以做乜都得嘅。」鄭宇碩也質疑莊永燦:「呢個係你(定義)嘅大事大非啫。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載