蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年10月03日

【八方相當年】周身刀無張利 周浩鼎仲要被罰企?

21,610
最後更新: 1003 13:50 / 建立時間 (HKT): 1003 08:00

要搵民建聯入面talk得幾嘴英文嘅,啱啱喺超區功能組別當選立法會議員嘅周浩鼎Holden應該係其中之一,相信因為佢放洋留過學之故,而喺英國讀書期間,Holden乜球都啱,但就係學唔精,自嘲周身刀無張利喎!

相關新聞:梁振英任內「告別作」 繼續sell迎難而上

37歲嘅Holden喺太古小學讀書,佢話有個中文老師成日講中國歷史,啟發佢對中史嘅興趣,「細細個已經對夏商周秦漢唐宋元明清背得好熟」,佢話細個讀書唔算差,有時都可以考到頭三名,唔算狂溫書,「媽媽唔係怪獸家長,唔太管我哋,都係靠自律」。

喺西灣河嘅香港中國婦女會中學讀到中五後,到英國寄宿學校Uppingham School過咗兩年愉快嘅時光,指學校著重all-round education多過考試求分數,對佢人生都好大啟發。佢話初嚟步到時英文麻麻,好在同學對佢呢位「少數族裔」都幾helpful。

相關新聞:【李八方online】「夢幻之旅」燈光滙演有小仙女?

除咗打籃球,原來佢都學過rugby、hockey同cricket;嘩,學咁多係咪周身刀無張利?「哈哈,你都可以咁講,都係勇於嘗試去學吓。」寄宿初期都有少少唔習慣,皆因生活規劃好嚴,例如10點半一定要熄燈、11點一定要瞓覺,「有次我未瞓,社監敲門後就喝住話係bedtime。」

佢話嗰時逢周一都要軍訓堂,教基本軍隊步操、上彈同拆槍,「有次好,有次步操我好遲鈍,畀教官罰,要我喺一邊練好先至入返team。」

大學入咗英國倫敦政治經濟學院(LSE)讀經濟學,佢話當時最難忘係有唔少名人到學校演講,錯過咗曼德拉嘅演講,卻聽過陳水扁談台獨,聽到一半就走人,「因為唔啱我口味」,仲話唔少在場中國留學生即場同陳水扁開拖。畢業後返港,佢曾經喺間日本公司做過嘢,「都係跟吓廠單,跑腿咁,但成日跑大陸,對內地認識多咗。」

之後佢去港大讀法律證書,兼入咗民建聯,仲喺最近做埋立法會議員。八方忍唔住問眼淺嘅佢,寄宿初期有冇因為人在異鄉而流淚?被網民封為「喊鼎鼎」嘅佢話:「咁又無喎!」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載