蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月11日

【短片】【八方相當年】林鄭係葉劉「妹妹」...容海恩就係林鄭小師妹!

建立時間 (HKT): 0711 06:00

新民黨主席葉劉淑儀向來盛產男徒弟,而且大都係名校生,政途亦平步清雲,其中極速升呢至政制及內地事務局副局長嘅陳岳鵬同「十優狀元」教育局局長政治助理施俊輝,都係史丹福大學畢業生,但嚟緊「葉劉跑道」多咗個「男仔頭」嘅女徒弟,就係有「翻版桂綸鎂」之稱嘅大律師容海恩(Eunice)。

眼大大、笑得甜兼身型高佻嘅Eunice,算係近年建制派少有樣貌標緻嘅女子,原來佢由細到大都唔係走長髮美女嘅路線,肖蛇今年39歲嘅佢憶述除咗幼稚園,小學至今基本上都係短頭髮,「細個個髮型都係阿媽剪」;睇返佢唔同階段嘅小時候,都確實冇唔少女仔都試過嘅孖辮look喎。

除咗外表確切似「男仔頭」,Eunice讀嘅科目,更加係男生為主導嘅學科。佢中一至中五喺著名女校嘉諾撒聖芳濟各書院(葉劉「妹妹」林鄭月娥,都係呢間舊生喎)畢業,之後再去玫瑰崗學校讀預科,其後則負笈加拿大英屬哥倫比亞大學(UBC),讀嘅竟然係電腦科學(ComputerScience)。

點解讀電腦又會做咗大狀?家陣仲有跟貼電腦界發展嘅Eunice話,從事咗兩年有關電腦嘅工作後,嫌加拿大生活太悶,回流香港喺城大讀JurisDoctor(JD)兼PCLL,2008年成為執業大律師。

嗱嗱嗱,盛傳佢9月就要以葉劉嘅跑道,喺新界東「試飛」,有乜秘技同街坊打成一片?唱歌都係好方法,呢方面唔會難到Eunice,因為音樂幾乎係佢第二生命,佢小一學鋼琴、小五學吹小號,閒時仲夾band出騷娛賓,但佢唔認係音樂奇才,只係喜好者咋噃!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載