› 選擇地區
三藩市
紐約
洛杉磯
其他美國地區
香港 台灣 北美
 
2016年05月27日

【短片】【動醒晨】考消防引體上升最難搞考官:有人一下都唔得

建立時間 (HKT): 0527 06:00

本港不少父母過度關注子女學業成績,而忽略子女的體能鍛練,令年青一代體能大不如前。有紀律部隊考官直指,近年投考的考生體能及心理質素每況愈下,有投考者「連一下引體上升都唔得」。就算成功錄取,部份人的心理堅韌度不足,抵受不住受訓壓力而退出,有曾做紥鐵的考生成功考取警員,卻抵受不住受訓壓力而請辭,重返紥鐵行業。

有多名曾任紀律部隊考官的資深紀律部隊人員承認,近年投考者的體能及心理堅韌度質素每況愈下,「可能同啲學生掛住溫習,冇時間做運動有關。加上新一代係父母嘅金叵羅,冇經濟壓力,可以隨時唔做都得,削弱佢哋嘅心理堅韌度。」

有資深消防人員指,消防處是眾多紀律部隊體能要求最高的部門,但近年投考者的能體質素卻參差,「好多人嚟投考嘅體力唔掂,唔少人連一下引體上升都唔得。」令考官搖頭嘆息。「我哋年代個個都操到好fit先嚟投考消防,而唔係靠打天才波。」

有資深警務人員更提醒考生就算成功考取警員,亦需要通過為期6個月嚴格訓練,才可正式成為警察,「現時學警需要接受6個月密集式訓練,每日受訓由早上6時半至晚上6時半,只有星期日休息,除需應付大量體能訓練外,仲要熟讀警例同程序,每兩個星期要考試,體能亦要達到教官定下嘅目標。」同時,警隊在受訓期間會不斷向學警施壓,「現今警員每日都面對社會不同壓力及挑戰,所以要學警盡快適應喺壓力下工作。」

不過,並非每名學警都順利通過嚴格訓練,據悉,近年約一成學警因未能通過訓練要求或壓力而退出,有曾做紥鐵的考生成功考取警員,卻抵受不住訓練壓力而請辭,重返紥鐵行業,消息人士稱:「嗰位考生係讀到書,有學歷,只係畢業時搵工比較難而做住紥鐵,後來成功考到做警察,點知佢頂唔住受訓壓力,決定唔做警察,走返去做紥鐵,亦有學警壓力太多,在父母鼓勵下決定請辭。」

浸會大學體育學系副教授雷雄德亦認同,現時年青一代的體質不及以往,指根據世衞學童體能指引,需每日做1小時運動,在上世紀七、八十年代,有七至八成以上的本港學童達標,但現在不足一成達標。

他認為現時紀律部隊的入職體能要求不算高,只是時下青少年體質比較差,「紀律部隊工種係一定需要體能,只不過現在後生仔體質比較差,如果我哋嘅年代根本係好合理。家啲人投考咁難,係因為由細到大體能鍛練嚴重不足,體質差,佢咪覺得(難),但係紀律部隊唔可以降低要求就啲考生,呢個唔合理。例如消防員要體力去抬人救人,所以佢哋(消防)請人有困難咯。」

記者:謝明明

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載