蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年04月10日

【李八方online】「舒琪」當「舒淇」?眾志忙中有錯

建立時間 (HKT): 0410 06:00

由黃之鋒、周庭、黎汶洛、羅冠聰、影評人舒琪等人成立嘅香港眾志今日創黨嘞,佢哋選擇咗喺香港藝術中心嘅戲院做電影首映暨創黨禮記者會,好多星級嘉賓捧場,包括黃耀明、何韻詩同王宗堯等,唔知係咪太多嘢要搞,香港眾志嘅事前準備同安排,似乎有啲甩漏喎,搞到首映同記者會未開始前,黎汶洛同周庭已經要道歉。

話說因為出席創黨禮嘅記者人數太多,加上要容納埋睇佢哋套首映嘅支持者,戲院座位未能容納。眾志副主席黎汶洛唯有宣佈,記者要首映完咗先可以入場出席記者會,向在場苦候多時嘅傳媒道歉。

眾志簡介嘅小冊字亦有唔少錯處噃,包括將眾志嘅常委「舒琪」寫成女影星「舒淇」、將幹事「王惠芬」寫成「黃惠芬」、連最重要嘅封面都有錯字,將眾數「theses」變成單數「thesis」,上述三個錯字,都要貼label改正。

而眾志喺小冊字寫咗捐款戶口,銀行係恒生銀行,由於記者會未開始,未知係咪以眾志名義成功開戶。

到最後,原來今晚首映嗰套由舒琪執導嘅《香港圍城》,仲未過電檢處㗎;唔可以播,首映會唯有變成分享會。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載