蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年03月22日

【李八方online】力保范國威同陳志全鄭家富放棄新東復出

建立時間 (HKT): 0322 06:00

立法會新界東二月舉行補選後,今年九月換屆改選勢必更熱鬧。早前表明「仲有團火」、積極考慮再戰新東前立會議員鄭家富,過咗近兩個月後,決定放棄出山喎!唔係怕輸啩?咁諗就太唔了解呢位鄭小班嘞。阿富話比例代表制下,佢若加入戰團,一定導致現為新東議員嘅新同盟范國威或人民力量陳志全敗陣,為咗顧全大局,決定唔去馬。

本身係天主教徒嘅阿富早前去咗朝聖,期間有所頓悟,同老婆商量後,覺得應畀番多啲時間畀屋企人。除咗家庭因素,佢話新東補選後,覺得公民黨楊岳橋同本土民主前線梁天琦都能清楚表達理念,有感民主派要畀年青一代接棒:「我唔好去搞亂個局……應該畀啲新思維進入議會,但當然唔係畀黃成智啦!」

當然唔好忘記,政治現實係比例代表制,多張名單票源隨時遭分薄攬炒,阿富承認自己若去馬,范國威或陳志全其中一個一定會輸,加上學民組嘅新政團及本土派都話要選,而佢支持戴耀廷嘅雷動計劃,為保住泛民喺直選嘅議席,決定唔出山。

阿富唔選,係咪代表范國威唔使去選超級區議會,留番新東老巢?阿富話,知道范國威話要去選超級區議會後,惹嚟好多人鬧,因為范國威等人係不滿民主黨支持超級區議會而退黨,佢話唔想多言,等佢哋自己諗下。

范國威強調新同盟選唔選超選,仍係未知數,因為臨近選舉,每日都有唔同嘅事發生。佢話近日開始落區,今日就喺自己嘅選區收集市民意見,睇吓市民點睇新同盟出選超級,形容至今意見兩極,一半一半,未有定案㗎!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載