蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年02月14日

【短片】【情人節】跨種族婚姻26載河國榮:鹹魚白菜也好好味

建立時間 (HKT): 0214 06:00

河國榮自22歲來港後,便未再打算回澳洲,不只是因為廣東歌吸引着他,還有一個女人令他甘願留港。來港一年多後,河國榮與香港人Bonnie結婚,至今已26年,別人眼中的跨種族戀愛,在他眼中沒有種族,只有愛情,而且26年的婚姻生活是「鹹魚白菜也好好味」。

記者:梁佩珊

河國榮剛抵港時,在補習社教英文幫補生計,當時Bonnie是他的學生,二人年紀相若,相遇到相愛,一年多後便結婚,河國榮笑言「我哋係師生戀」。當年一個住北角,一個住筲箕灣,於是乾脆搭電車拍拖,「最重要係浪漫,當年叮叮真係叮叮聲,唔係依家嘅咇咇聲」。河國榮當時以旅遊簽證來港,中途需離港三個月,於是「天天寫,封封寫滿六百句的『我愛你』」。河國榮三個月以來,每天寄一封信,每星期寄一盒30分鐘的錄音帶,錢都全花在給Bonnie的情話,「好讓夢境永遠只得一對,一分一秒熱吻身影」,其中一盒錄音帶就是唱譚詠麟的《半夢半醒》;「依家(情侶)網上溝通,只有一段一句,已經冇咗手寫字嘅感情」,但他表示不敢再睇返情信內容,「過多20年我就會睇返」。離港期間,雙方知道自己不能失去對方,於是河國榮回港後便決定結婚。

不過,原來當初Bonnie的爸爸反對他倆結婚,河國榮是用言行感化Bonnie的爸爸,與Bonnie一家兩次共患難,才真正成為家人。二人當初結婚後住劏房,「我哋窮,當時唔講錢,唔似依家大家有樓先結婚,我覺得開心就得」。結婚26年,河國榮至今仍以太太先行,「買咗佢鍾意嘅朱古力,我唔食,得500克咁少,留畀佢食」。河國榮的演藝事業起起伏伏,他覺得多年來賺不了錢,就算做了錯誤決定,Bonnie都無條件支持他,「同佢結婚係人生中最重要嘅決定,佢呢個人冇得頂!」,當日拿着單程機票來港,遇上Bonnie,河國榮說一切都是緣份。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載