› 選擇地區
三藩市
紐約
洛杉磯
其他美國地區
香港 台灣 北美
 
2016年01月16日

【法政匯絲】港女表示很想要

建立時間 (HKT): 0116 06:00

我崇洋。除咗因為我身體很誠實喜歡吃西餐之外,更因為洋漢個
package已包含(好似含,除非不含)嘅個本外國護照。

我很想要外國護照,因為我怕。我怕香港會冇言論自由、我怕香港會冇法治、我怕將來我嘅仔女(如有)要喺一個由不需要向香港人交代嘅政府管治嘅社會中成長。冰封三尺,非一日之寒,喺李波事件發生前,我細細個已經開始怕怕同經常流連以西餐聞名嘅架步。

「畀你攞到外國護照又點先?」早兩日我同Cissy喺MOBar飲嘢果陣,佢問我。

我呆一呆。係喎,又點先?「我又冇認真打算離開香港喎,我熱愛這片土地呀。但係,我想有個保險囉。我幻想攞住個外國護照,就可以喺討論香港問題嘅時候,講得free啲大聲啲;喺捍衛香港司法獨立同法治嘅時候,企得直啲同大搖大擺啲……」講出嚟我都覺得好傷感──正因為我熱愛香港,我先更加需要喺某程度上脫離香港,以換取一個空間,為香港爭取公義。

「小姐,你錯哂!」Cissy一句K.O.我。「首先,就算你好似李波咁持英國護照,強力部門要搞你的話,無論你是否身在香港,你都係走唔甩。第二,就算你真係離開香港,你以為外國就冇不公義喇咩?以你嘅性格,都係一樣會為當地嘅問題發聲,一樣會憂慮受打壓,咁到時唔通你又再攞另一本護照又再移民?」

又係喎。而家已經唔單係地域嘅問題,而係原則嘅問題。當我選擇追隨良心,相信人權、平等、自由同民主呢啲普世價值,揸咩護照是咪真係咁緊要?又,冇嘢係完美嘅,包括香港社會都冇可能係完美嘅,但唔通因為咁就輕易投降完全唔爭取?

「仲有一個重點:洋漢不一定含外國護照,港男亦不一定不含!你知唔知你曾經講過,揀伴侶最緊要係價值觀同人品?」Cissy當頭棒喝。「知!」我弱弱的撐:「但副偈嚟講,真係有分別嘛。」

Cissy忽然對住部手機狂笑。「不如考慮approach下呢位同志?佢副偈好似好得喎,又夠一帶一路,你同佢一齊很肯定日日都會好開心!」原來佢睇緊毛記電視東方昇為2016香港施政報告拍攝嘅封面。我心心眼,吞一吞口水,well,強行招下親都好喎……

@東方昇:親,今晚有空一起食好西嗎?等您。

StephanieMatias@法政匯絲

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載