蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年12月10日

【李八方online】吳得掂遊日有心得東京夜晚睇星好正

李家皓攝
建立時間 (HKT): 1210 06:00

上月底被指請假去日本睇紅葉,唔出席TSA公聽會嘅教育局局長吳克儉,今日用咗一粒鐘,去日本人俱樂會歡送一班即將訪日嘅香港學生,仲即席分享遊日心得;月睇卅本書嘅佢,出版遊日攻略肯定冇得輸。

雖然吳得掂以「私人嘢」為由,拒答八方上月底係咪去過東京?但佢同學生分享時就透露:「我最近去過(東京)嚟,我去咗東京大學,我專登行過去」,更指「東京有兩個公園好靚㗎,呢個時候去都好靚㗎,嗰晚我去呢,個湖邊好靚,夜晚睇星好靚,啲紅葉影咗啲燈好唔同,好值得去。」

佢分享遊日心得時,有幾項特別推介叫同學一定要試,包括要搭地鐵、唔好搭的士,因為的士好貴,又話日本街上好多飲嘢機,有成80至100款選擇。博覽群書嘅局長又話,去到日本一定會去超市,因為好多新鮮嘢睇;雖然唔識日文,但都會花成粒鐘喺報攤同書店,「上次買咗六本雜誌」,「你會覺得好有趣、好刺激」。

佢講到東京係Cityofcats時,興奮到高舉右手扮貓,但講得最多都係食,多次強調「食嘢好正㗎、真係好正」,「我有一次去新宿,食咗個放題,好正,任食」,又叫學生要去超級市場、地下城,「真係好多嘢食」,仲自爆每次去日本,都會確保每日嘅早、午、晚餐,餐餐唔同,覺得當地咖喱、豬扒特別好食,「最享受食放題」。

日本學生,吳得掂都話交流埋:「我第一次去(日本),我點樣呢?我去到,我喺車裏面望住啲著制服的學生,初時唔係好方便,因為啲語言,但我慢慢講,佢哋就聽得到啲,有時我用動作去表達,用啲bodylanguage」,強調googletranslate幫到唔少手喎。

哦,局長掛住研究遊日攻略,難怪冇乜時間在港睇下點樣改善TSA制度啦!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載