【李八方online】「警長」出山幫岳少搞文化

喺《信報》工作咗28年，職位至《信報》副社長及數碼媒體總裁，行內專稱「警長」嘅陳景祥，去年拋低一句「道不同」後辭職，當時有傳《信報》管理層不滿佢管理嘅網站不時評批特首梁振英及中央政策，將網站編輯部轉交總編輯郭艷明直接管理，事隔數月，警長終於出山，搞文化產業。

香港文化產業聯合總會（文聯會）發出新聞稿，指今日召開首次理事會暨常務理事會會議，決定第三季舉行成立典禮，會議另一決定，就係委任陳景祥做該會行政總裁，但無透露人工及職權。

文聯會首屆監事會主席係全國政協、中國文化產業協會會長張斌，江湖傳聞牽頭嘅林建岳就做首屆理事會會長，理事陣容星光熠熠，副會長有趙薇，陳寧寧、鄭家純、何柱國、劉長樂、許家印、楊受成、黃志祥、牛根生等多位中、港富豪都係副會長。文聯會office位於長沙灣麗新商業中心，單位係岳少麗新發展名下物業。

見到呢個班底，有政界中人分析，文聯會似乎項莊舞劍，旨在提委，好可能係搭定個台準備「造王」，皆因選委會出版小組、文化小組、演藝小組、體育小組合共近60席，上屆全數自動當選，所以盡早拉攏業界大佬，到「分餅仔」時更加有利，據了解身兼港區人大代表嘅體育、演藝、文化及出版界功能組別議員馬逢國並無加入。