蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年06月15日

【鳩嗚乜乜乜】「波霸」復出?大葉紫薇近日盛放

觀塘明渠邊大花紫薇正盛開。 倪清江攝
建立時間 (HKT): 0615 06:00

「波霸」葉紫薇復出?不過此葉紫薇不同彼葉子楣,而係一種紫色花樹。

近期全港各區,都可以睇到呢種樹,全部開緊紫色花朵,一般高兩米以上,整棵樹有手掌般大嘅樹葉,紫色花則沿住凸出、反地心吸力向上生長嘅樹枝,由下向上爆開,好顯眼,而且今年好似開得特別靚。

康文署好多時會喺樹幹上掛上名牌,呢種就叫「大花紫薇」(學名Lagerstroemiaspeciosa),喺康文署沙田總部大樓外,就種了多棵;費清喺堆填區路邊都見到成條街有種。

大花紫薇,同葉子楣有咩關係?原來大花紫薇舊名就叫大葉紫薇,連維基同教育局樹木資訊網頁都有列出呢個前稱。有網上資料指康文署自1997年後一律更改標示為大花紫薇,原因係為咗避開紅極一時、姓名讀音一樣的「波霸」葉子楣,不過呢個說法無從查證。

點解話大葉紫薇復出?費清近日行過剛啓用的康文署觀塘遊樂場,就見到場內的大花紫薇名牌,係寫「大葉紫薇」,唔通「波霸」息影後,康文署打破禁忌畀舊名復出?不過,行過幾步到隔籬觀塘泳池入口花圃,就見寫返「大花紫薇」,睇嚟可能有人唔小心用咗舊名,搞到一花兩名。

費清#要生計,也要生活#毋忘初衷

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載