› 選擇地區
三藩市
紐約
洛杉磯
其他美國地區
香港 台灣 北美
 
2014年02月08日

【網民hottalk】教育局鬼祟刪普教中壞處網民:又撐普通話?

吳克儉統領的教育局,經常被質疑推行撐普通話的政策。
建立時間 (HKT): 0208 06:00

繼將廣東話定性為「一種不是法定語言的中國方言」後,吳克儉統領嘅教育局又有新搞作,今次係喺網頁內將「普教中」(普通話教授中國語文科)嘅壞處删除,網民質疑係要唱好普教中,令香港下一代多講普通話,少講廣東話。

近年唔少學校都推行普教中,但呢種教學方法係咪可以「一箭雙鵰」,令學生同時學好中文同普通話?答案一直有好大爭議,有家長同教育工作者更認為容易有反效果,令學生同時討厭同文同普通話,所以普教中未必係好事。

就連教育局網頁中對中國語文教育嘅「問與答」欄目,原本亦好誠實講明:「目前仍未有確實證據,證明以普通話學習中國語文的學生的一般中文能力會有所改善。其中兩項研究發現,以普通話學習的學生的中文能力,與以廣東話學習的學生並無分別,甚或表現更差。」

但教育局網頁近日靜靜雞將以上內容刪除,直至網民發現、《蘋果》追問,教育局先至話網頁內容要更新,遲啲會再次上載。

網民就質疑如果要再次上載,咁做乜要刪除呢?而刪除嘅內容,偏偏係講緊普教中嘅壞處,點解會咁巧合呢?如果冇人發現,有關內容會唔會「唔再提就唔存在」,世上只剩下普教中嘅好處呢?更有網民更認為,教育局近來多多小動作,「講到底都係撐普通話,想消滅廣東話囉」。

另有網民形容用普通話學中文,等於「用外語學中文」,成績點會好?而「普教中學生關注組」就成立facebook群組監察政府,開宗明義要保衞粵語,歡迎大家加入。

「普教中學生關注組」fb群組:
http://on.fb.me/1eycaK1

網民點睇:
JamesLeung:用常識去判斷:你用外語學中文,會唔會好過母語?
KwokWahWong:粵語的九聲應可列為非物質文化遺產。
KarsonWoo:普教中,根本就係垃圾政府為了獻媚,而出現的垃圾政策。
JeffreyChu:好慶幸自己讀中學小學都係用廣東話教中文唔明點解近年咁多小學都普教中,佢哋考DSE中文咪又係用廣東話?==根本普教中就係多餘!!!
MarcoCheng:君不見距離本港百多公里外的羊城,連學生在課外和校外所說的語言都控制,即只准說普通話,不准說粵語。只能說:「今日在廣州發生的,明日就到本港。」
CheungSikLun:學普通話同以普通話取代廣東話係兩回事。
JackieMak:身為教育官員,行為卻是偷雞摸狗,先不要說官,就是「教育」二字,你們這一班賊如何可以背得起?

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載