› 選擇地區
三藩市
紐約
洛杉磯
其他美國地區
香港 台灣 北美
 
2019年09月12日

隔牆有耳:政府再回應訴求?市民集體炒車 - 李八方

《南華早報》噚日否認發表過政府會回應民間「其他訴求」嘅相關報道。互聯網

自反送中運動開始,好多市民除咗靠主流媒體得到消息,fb、TG同各大討論區都係獲得消息渠道,但有時消息未經核實,隨時係fake news,令大家集體炒車。好似噚日網上流傳一則疑似彭博消息,話引述《南華早報》報道,政府會回應民間「其他訴求」假新聞,再加埋差人突然取消4點記者會,就令好多人炒車,以為政府接納搞獨立調查委員會。

警突取消記招似層層

噚日朝早網傳多幅疑似彭博通訊社終端機嘅畫面截圖,聲稱彭博以「Market Chatter」形式發表「突發新聞」,話引述《南華早報》指港府下午4時回應「其他訴求」,好多人估政府係咪接納搞獨立調查委員會?更有傳政府4點開記者會宣佈,正當傳聞滿天飛,差人又忽然宣佈取消原訂4點記招,更加令傳聞似層層。

不過好快彭博、《南早》否認曾發表相關報道,截圖係假嘅,特首辦亦話冇喺4點開記者會,呢個時候又傳其實4點個記者會係講政府同發展商收購土地,但發展局好快否認,原來全部係流料!至於差人為乜取消4點記招?差人喺fb解釋,過去五星期每日記者會,原本為過去24小時或周末發生過重要事件向傳媒同市民交代,未來將改成按需要喎!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載