› 選擇地區
三藩市
紐約
洛杉磯
其他美國地區
香港 台灣 北美
 
2019年07月23日

隔牆有耳:撐警集會叫人用藤條水喉通辣㷫全城
石鏡泉道歉撤回「打仔論」 - 李八方

星期日晚元朗出現大群疑似黑社會嘅白衣暴徒,手拿藤條、棍棒、水喉通等,無差別襲擊無辜途人同記者,甚至連女人細路都唔放過,可謂人神共憤。當晚有網民重提事發前一日,《經濟日報》副社長石鏡泉出席建制派「守護香港集會」,佢喺台上發言,大大聲叫人去用藤條「打仔」、水喉通「教仔」,結果成班黑社會照跟,事件不但觸發全城聲討,近百名《經濟日報》記者同員工仲發聯合聲明,批評石鏡泉提出「藤條水喉通打仔」煽惑暴力言論,並為此深表震驚同極度遺憾。

員工聯署投訴違公義

其實《經濟》員工未出手,網民罷買《經濟日報》同旗下刊物;發起一人一信投訴《經濟日報》同石鏡泉,亦有財演、學術界中人話唔接受《經濟》訪問,同石「恥與為伍」。

《經濟日報》員工亦發聲明批石鏡泉公開喺台上感謝涉嫌有份「吹雞」參與元朗事件嘅鄉親,「與新聞人褒善貶惡、維持社會公義的天職互相違背」,同合理化暴力行為,又鬧石作為新聞集團嘅管理層,未有譴責針對無辜平民嘅暴力行為,更冇捍衞前線記者嘅採訪安全,「反而鼓吹及煽惑施暴行為,實在令人髮指。」

石鏡泉搞到咁大件事,亦拖累《經濟日報》集團股價插1.2%,收報1.62元,而《經濟日報》管理層自然要救火,噚日下午網上流傳《經濟日報》集團企業傳訊部發出內部聲明,強調個人反對暴力,並重申編採部秉持公平、公正、公道同中肯原則,更有消息指,該報編採部曾建議開天窗,但遭到拒絕。

到夜晚輪到石鏡泉發表道歉聲明,包括撤回之前嘅藤條與軟膠通言論同道歉;譴責周日晚嘅元朗暴力事件,稱非事前所能預及,亦毫不知情;當時係以個人名義出席集會,並非代表《經濟日報》身份;言論係希望大眾保衞自己嗰陣要拒暴,又指部份網上片段並非事實嘅全部等。佢呼籲各方應以香港人嘅大局利益出發,存異求同。

向港台請假封咪一周

不過話就話道歉,但唔代表咁就冇事,有法律界人士同八方講,石言論可以係煽惑他人做犯法事,當年政府都係咁去告佔中三子,政府告得佔中三子,唔係唔理石鏡泉煽惑人去傷人嘅言嘛!

石鏡泉為香港電台第一台同港台電視31逢周六聯播節目《投資新世代》,仲有周一至五港台《晨光第一線》嘅《晨光大舊石》環節擔任主持,有網民質疑佢公開煽動他人犯罪,要求港台停止佢喺港台所有工作,《蘋果》記者噚日向港台了解,港台發言人話石鏡泉噚日已因事向港台請假一星期,又話節目主持喺節目以外嘅言論自由,佢哋係尊重,但如果影響到主持嘅形象就會高度關注。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載