› 選擇地區
三藩市
紐約
洛杉磯
其他美國地區
香港 台灣 北美
 
2019年07月02日

城姐遊行 誓還原6.12真相

【7.1大遊行】
【本報訊】警方被指在6.12事件中濫用暴力,向和平集會的市民發射催淚彈及橡膠子彈,多名參與7.1遊行的市民包括在6.12挺身阻止警方開槍的媽媽陸錦城(城姐,圖),均批評警方使用過份武力,「你落手輕定重,攻擊邊個部位,呢啲一定係個人選擇」,他們敦促政府盡快成立獨立調查委員會徹查6.12事件,還原真相。
記者:潘柏林 袁楚雙 林凱潼

昨參與遊行的陸錦城批評,警察在6.12使用過份武力,對無衝擊的示威者開槍,「我唔敢想像呢啲情況喺香港發生」。她認為政府需成立獨立調查委員會還原事件真相,「你又調查警方,又調查示威者,你調查埋我都唔緊要,有持份者你都可以調查,如果大家都係清白嘅,事無不可對人言,有乜嘢唔見得光?」

相關新聞:警反常善待記者 猶如拍《警訊》

「落手輕重係個人選擇」


遊行市民何先生亦支持追究警暴,認為警員站崗位置是上級編配,但武力的使用在於個人,「你執行時個人都可以有個選擇,你落手輕定重,攻擊邊個部位,呢啲一定係個人選擇」,並指顯示獨立調查委員會的必要性,「調查本身係冇針對性,點解佢哋咁排斥?係咪有啲真相唔想公諸於世?」他續指,應該調查完才定性事件,「你先定性(暴動),先有結果再做出行動,咁即係你有bias(偏見)啦」。

社工黃先生指,現時警民關係已達臨界點,因警方對遊行人士一直多番掣肘,「嗰日(6.12)已經拎咗不反對通知書,點解仲要咁樣去驅趕呢?」他表示警方身穿制服代表專業更應克制,「當佢哋着住制服仲夾雜私人情緒真係好危險,佢哋有警棍、有催淚彈仲有槍!」他認為警方應反問自己的良心。

籲勿讓監警會查自己人

6.12在太古廣場工作的鍾小姐指,相對歐洲示威,香港是非常和平,對警方使用武力感到非常不開心,「呢班係細路仔嚟,佢哋只係stand up for their rights(為自己的權益站出來),佢哋唔係暴動一分子囉,唔可以用一支黑筆話晒佢哋係暴徒」。她強調,獨立調查委員會必須由真正獨立人士參與,不可由投訴警察課及監警會自己人查自己人。

嶺南大學學生鄧小姐批評,警方6.12清場手法非常暴力,至今仍心有餘悸,「警方嘅手法係好無理同好恐怖」,有關行為已粉碎她對警方的尊敬,並質疑警方當日的行為滲入私人情緒,「肯定有,或者佢哋真係儍咗啦,唔係嘅話我諗唔到其他理由為佢哋辯護」。
文職人員黃小姐指,6.12示威者衝擊不嚴重,警方不需使用過份武力清場,指有一名母親勸喻警方克制,卻遭胡椒噴霧驅趕,「嗰個女人冇做啲乜嘢,又唔係挑釁你,你對佢射胡椒噴霧嗰刻已經係濫用權力!」她敦促政府撤銷6.12暴動定性及成立獨立調查委員會徹查事件,「如果政府講到自己咁公平公正,咁點解你唔肯做呢樣嘢呢?」

相關新聞:四衝擊行動 由示威者投票選擇

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載