› 選擇地區
三藩市
紐約
洛杉磯
其他美國地區
香港 台灣 北美
 
2019年06月21日

隔牆有耳:醫學會反送中冇立場 蔡堅扯火 - 李八方

今次《逃犯條例》修訂風暴,各行各業都全力投入反送中行動,而醫學界嘅動員同參與都可謂遠超雨傘運動時期,幾乎所有工會同組織都表晒態,不過唯獨是全港最大醫生團體醫學會,就一直冇聲氣,至今都冇立場,亦係繼傘運之後醫學會再次「缺席」大型社運。八方聽聞原來醫學會內部曾經因為出唔出聲明拗咗一大輪,最後決定下個月會董會至肯傾,搞到一向好好火嘅醫學會會董蔡堅(圖)非常勞氣,覺得自己都身體力行反修例,冇理由醫學會到𠵱家一句聲都唔出。

改選會董篩走保守派

醫學會會長何仲平同八方講,因為會董之間支持同反對《逃犯條例》修訂意見都有,唔可以好似其他工會咁容易達到共識,所以暫時唔表態;加上娥特都已經話暫緩修例,所以佢哋都唔再急於發聲。佢仲話噚日已經搵咗堅叔飲咖啡解釋成件事,話堅叔聽完之後「冇再拍枱」喎。不過據聞部份新加入嘅會董,都仲係好不滿醫學會嘅決定,有人更加話要趁住𠵱家改選會董,篩走保守派醫生喎!睇嚟今次反送中運動,將會令嚟緊醫學會改選引發一場龍爭虎鬥。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載