› 選擇地區
三藩市
紐約
洛杉磯
其他美國地區
香港 台灣 北美
 
2019年06月20日

隔牆有耳:張華峰爆咪認證
麥美娟問候娥特老母 - 李八方

特首林鄭月娥喺數以百萬計市民上街反送中惡法後,決定暫緩提交惡法畀立法會二讀,佢宣佈暫緩前喺禮賓府密晤建制派議員,傳出當時俾人以粗口問候,搞到花生期貨價格上升。有傳爆粗者係工聯會麥美娟,但就冇人證實,直到噚日網上流傳一段聲帶,相信係經民聯張華峰前日開監警會會議後同主席梁定邦對話,證實怒×娥特嘅人就係麥美娟!

梁定邦笑住話失身份

點解張華峰同梁定邦對話會流出?有政界中人猜測,佢兩個九成九同之前廖長江開立法會爆「西環拆天」一樣唔記得熄咪!張華峰喺對話入面直指麥美娟開會時問候娥特老母,又話麥大鬧林鄭「你估淨係你識喊,我都識喊」,梁定邦就笑住話作為議員咁問候人哋老母有失身份。

有晒錄音,麥美娟又認唔認?噚日佢現身立會,俾記者追問係咪爆粗鬧娥特,佢只係不置可否,又話唔會透露閉門會議內容,又話𠵱家唔應該再斟酌政府有冇出賣建制派,建制派選情亦非當前之急,最重要係令香港停止延續緊張氣氛,唔應該再着眼個人名利得失或選舉結果喎。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載