› 選擇地區
三藩市
紐約
洛杉磯
其他美國地區
香港 台灣 北美
 
2019年06月12日

隔牆有耳:揸住外國樓 唔怕撐送中
建制派逃生有門 - 李八方

送中條例人人自危,一國一制近在咫尺,立法會今日開始就《逃犯條例》修訂恢復二讀,建制派歸晒邊,霸王硬上弓下過關已經冇乜懸念,相信有方法、有能力嘅港人梗係鋪路移民,而一旦出事被引渡送中,相信逃亡都要有個竇㗎。《蘋果》翻查69位立法會議員嘅立法會申報資料,九位議員原來有喺外國置業,建制泛民議員統統都有,一旦大吉利是出咗事,外國樓隨時變咗逃生門,冇份投票嘅市民,相信只能羨慕!

謝偉俊擁六美帝物業

曾經係英國人嘅立法會主席、經民聯梁君彥,身體最誠實,佢申報喺英國擁有物業。梁君彥2016年因為要登上立法會主席寶座,被迫放棄英籍。但有權有勢、有錢有樓,要攞番個英國居留權,點會係難事?喺英國擁有物業嘅唔止梁君彥一個,自由黨易志明、議會陣線毛孟靜、專業議政梁繼昌都有英國樓揸手,其中梁繼昌仲申報喺英國有兩個物業。

至於美國,資訊科技界嘅莫乃光、實政圓桌田北辰、「西環契仔」謝偉俊一樣都喺當地有物業,當中獲建制派推舉做法案委員會主席嘅謝偉俊就最巴閉,喺賭城拉斯維加斯置業,而且唔係一個,而係六個,相反佢喺北京都係得一個物業咋噃,唔通呢啲就係建制派對佢「另眼相看、委以重任」嘅原因?至於港人移民熱點加拿大,喺英國有物業嘅毛孟靜同樣申報喺楓葉國有樓。早前一度自稱「我無能」嘅經民聯石禮謙其實有能力逃亡,喺溫哥華有物業。而年輕人最喜歡日本,民主黨涂謹申就申報自己同太太喺日本擁有三個住宅單位。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載