› 選擇地區
三藩市
紐約
洛杉磯
其他美國地區
香港 台灣 北美
 
2019年06月05日

隔牆有耳:坦克人「照妖」
保皇黨聞六四 雞飛狗走 - 李八方

六四30年仍未平反,北京屠城就成為今日嘅照妖鏡!BBC記者早前拎「坦克人」相問北京市民,《蘋果》記者亦拎同一張相去立法會問班建制派議員,估唔到張相好似有法力嘅靈符咁,北京市民都未驚,但呢班保皇黨見到就雞飛狗走。

田二少:歷史自有公論

民建聯嘅梁志祥一見張相,就話「唔記得發生咩事、唔知個日子係幾時」,但之後一邊話冇意見,一邊開始大放厥詞:「個社會已經30年,都唔係今日嘅事啦,30年前嘅事啦,一切都係歷史啦。」呢種係咪選擇性失憶呢?佢啲黨友見到張相就突然一齊扮勤力,陳克勤同陳恒鑌都話趕時間開會,上年被問到變「周hang機」嘅周浩鼎,就向黨友偷師用開會做藉口;至於葛珮帆,就使出一招「借尿遁」閃人。

其他建制派又點?工聯會黃國健話冇興趣接受《蘋果》訪問,仲手指指鬧「《蘋果》專門係造謠」;「班長」廖長江亦話唔受訪,反而最敢答嘅係「元秋」蔣麗芸,一望張相就講:「知呀,六四嗰陣嘛」,然後眼神一直冇離開過張相。咁係咪應該平反六四?元秋就話由北京決定,「要喺適合時候、時代、時間」。另一個肯答八方嘅建制派係實政圓桌田北辰,「我知大家都好關注,歷史自有公論,合適時候,國家一定會處理呢件事」。

至於近日被網民翻舊賬嘅梁美芬,八九年時係記者去過北京採訪,事後仲接受訪問讚北京學生和平,事隔30年,佢當然唔會再好似當年咁呼籲香港傳媒要如實報道北京情況,取而代之係話自己嘅意見喺書同文章都提過,叫八方自己睇返喎。特首林鄭月娥亦唔見得好好多,被問到會唔會要求北京平反六四時,只係話:「今日嘅日子,好多人都有一個回憶。」

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載